لێدوانی ناتانیاھو لەبارەی کۆنفرانسی پاریس

قودس

سەرۆکوەزیرانی ئیسرائیل، بێنیامین ناتانیاھو کۆنفرانسی ئاشتی رۆژھەڵاتی ناوەڕاستی لە شاری پاریسی پایتەختی فەڕەنسا بە"بێ مانا" ناوبرد.

ناتانیاھو لە کۆبوونەوەی ھەفتانەی کابینەی حکوومەتی ئیسرائیل وتارێکی پێشکەش کرد و گوتی: "ئەو کۆنفرانسە بەمەبەستی سەپاندنی چەند مەرجێک بەسەر ئیسرائیلدا بەھەماھەنگی فەڵەستین و فەڕەنسا سازکراوە و لەگەڵ بەرژەوەندی نیشتمانی ئێمەدا ناگونجێت".

لە لایەکی دیکەشەوە سەرۆکی پارتی کار و سەرکردەی ئۆپۆزسیۆنی ئیسرائیل، ئیسحاق ھێرزۆگ رەخنەی توندی لە بەشداری نەکردنی ناتانیاھو لە کۆنفرانسی پاریسدا گرت و گوتی: "پێویست بوو بەشداری لە کۆنفرانسی پاریسدا بکات، نەوەک واز لە خەبات بھێنێت".

ئەمڕۆ بە بەشداری ٧٠ وڵات، کۆنفرانسی ئاشتی لە شاری پاریسی پایتەختی فەڕەنسا بەمەبەستی دووبارە دەستپێکردنەوەی دانوستانەکانی ئیسرائیل و فەڵەستین دەستی پێ کرد.