هیچ پڕۆژه‌ یاسایه‌ك بۆ ده‌ركردنی هێزه‌كانی ئه‌مریكا له‌ عێراق ئاماده‌نه‌كراوه‌

هه‌ولێر-AA
ئه‌مریكا له‌ شەش پارێزگای عێراق بنكه‌ی سه‌ربازیی هه‌یه‌ و به‌شی زۆری بوونی ئه‌مریكییه‌كان له‌ ناوچه‌ سوننه‌ نشینه‌كاندایه‌ و به‌پێی قسه‌ی به‌یاتی بێت ئه‌مریكا به‌شێك له‌ هێزه‌كانی له‌ سووریاوه‌ بۆ عێراق كشاندووه‌ته‌وه‌.
سه‌رباری ئه‌وه‌ی هێزی سه‌ربازیی زیاتر له‌ 20 وڵات له‌سه‌ر خاكی عێراق بڵاوبوونه‌ته‌وه‌، به‌ڵام سه‌ربازه‌كانی ئه‌مریكا پتر له‌هه‌ر وڵاتێكی دیكه‌ مقۆمقۆی دروستكردووه‌ و زۆرترین قسه‌یان له‌باره‌وه‌ ده‌كرێت، به‌تایبه‌ت له‌ دوای تێكشاندنی داعش له‌ ساڵی 2017 و دۆڕاندنی 99 له‌سه‌دی ئه‌و خاكه‌ی له‌ژێر ده‌ستی دابوو، چه‌ند رۆژێكه‌ میدیاكانی عێراق ده‌نگۆی داڕشتنی پڕۆژه‌ یاسایه‌ك ده‌كه‌ن له‌ لایه‌ن لێژنه‌ی ئاسایش و به‌رگری ئه‌نجوومه‌نی نوێنه‌ران كه‌ گوایه‌ بۆ "ده‌ركردن"ی هێزه‌كانی ویلایه‌ته‌ یه‌كگرتووه‌كانی ئه‌مریكا له‌ عێراق كه‌ له‌ ساڵی 2003 عێراق-یان داگیركرد و به‌پێی رێككه‌وتننامه‌ی ستراتیجی ئه‌منیی نێوان هه‌ردوو وڵات دوایین سه‌ربازی ئه‌و وڵاته‌ له‌ 2011 عێراقی به‌جێهێشت، به‌ڵام دواتر و له‌ دوای هێرشه‌كانی داعش له‌ حوزه‌یرانی 2014 به‌ته‌رزێكی دیكه‌ هاتنه‌وه‌ بۆ عێراق و ئه‌مجاره‌ له‌گه‌ڵ ئه‌واندا هێزی چه‌ندین وڵاتی دیكه‌ش له‌ژێر چه‌تری هاوپه‌یمانی نێوده‌وڵه‌تی دژ به‌داعش هاتنه‌وه‌ عێراق.
به‌پێی زانیارییه‌ فه‌رمییه‌كانی سه‌رچاوه‌ سه‌ربازییه‌كانی عێراق، پێنج هه‌زار و 500 سه‌ربازی ئه‌مریكی له‌ عێراقدا هه‌ن كه‌ له‌ هه‌شت بنكه‌ی سه‌ربازیی جێگیركراون، ئه‌و بنكه‌ سه‌ربازییانه‌ ده‌كه‌ونه‌ شەش پارێزگای عێراق كه‌ ئه‌وانیش پارێزگاكانی نه‌ینه‌وا، هه‌ولێر، كه‌ركووك، سه‌ڵاحه‌ددین له‌ باكووری عێراق، هه‌روه‌ها پارێزگاكانی به‌غدا، ناوه‌ڕاستی عێراق، ئه‌نبار رۆژئاوای عێراق.
به‌قسه‌ی به‌رپرسانی باڵای ویلایه‌ته‌ یه‌كگرتووه‌كانی ئه‌مریكا له‌نێویاندا به‌رپرسه‌ سه‌ربازییه‌كانیان، بوونی هێزه‌كانی وڵاته‌كه‌یان له‌ عێراق سێ ئامانجی هه‌یه‌ ئه‌وانیش بریتیین له‌؛ پێشكه‌شكردنی راوێژی سه‌ربازی به‌هێزه‌كانی عێراق، هه‌روه‌ها مه‌شق و راهێنان به‌و هێزانه‌، به‌تایبه‌ت كه‌ له‌ ساڵی 2014ه‌وه‌ ده‌ركه‌وت هێزه‌كانی عێراق پێویستیان به‌ مه‌شق و راهێنانی زیاتر هه‌یه‌، له‌گه‌ڵ ئه‌وه‌شدا پڕچه‌ككردنی ئه‌و هێزانه‌ و راهێنانیان له‌سه‌ر ئه‌و چه‌كانه‌ی وڵاته‌كه‌یان به‌رهه‌می ده‌هێنێت.
ئه‌ندامی لێژنه‌ی ئاسایش و به‌رگری له‌ ئه‌نجوومه‌نی نوێنه‌رانی عێراق، هه‌رێم كه‌مال ئاغا بۆ ئاژانسی ئانادۆڵو ره‌تی ده‌كاته‌وه‌ هیچ پڕۆژه‌ یاسایه‌ك له‌ لایه‌ن لێژنه‌كه‌یانه‌وه‌ بۆ "ده‌ركردن"ی هێزه‌كانی ئه‌مریكا له‌ عێراق ئاماده‌كرابێت و رایده‌گه‌یه‌نێت "ئێمه‌ له‌ لێژنه‌ی به‌رگری و ئاسایش نه‌ بینیومانه‌ نه‌ به‌رزكراوه‌ته‌وه‌ و نه‌ هاتووه‌ته‌ لێژنه‌كه‌شمانه‌وه‌ ئه‌سڵه‌ن، ئه‌م پرسه‌ دووره‌ له‌ڕاستییه‌وه‌، ره‌نگه‌ لایه‌نێك یان چه‌ند لایه‌نێك بیانه‌وێت وه‌كو فشارێك باس له‌و مه‌سه‌له‌یه‌ بكه‌ن و مه‌به‌ستیان هه‌بێت وه‌ڵامی هه‌ندێك پڕوپاگه‌نده‌ بده‌نه‌وه‌، واته‌ وه‌كو كاردانه‌وه‌یه‌ك بێت، به‌ڵام ئه‌و بابه‌ته‌ هیچ راستییه‌كی تیادا نییه‌ كه‌ گوایه‌ هاتبێته‌ لێژنه‌كه‌مانه‌وه‌".
سه‌باره‌ت به‌وه‌ی ئه‌گه‌ر پرسێكی وا بێته‌ ئاراوه‌ ده‌نگی پێویستی په‌رله‌مان ده‌هێنێت یان نا، هه‌رێم كه‌مال ئاغا رایگەیاند کە كورد و سوننه‌ و به‌شێكی شیعه‌ش له‌گه‌ڵ مانه‌وه‌ی هێزه‌كانی ئه‌مریكان له‌ عێراق و گوتی: "پێم وایه‌ لایه‌نی كورد به‌هه‌موو فراكسیۆنه‌كانه‌وه‌ له‌گه‌ڵ مانه‌وه‌ی هێزه‌كانی ئه‌مریكادان له‌ عێراق تا ئه‌و كاته‌ی بارودۆخی عێراق جێگیرده‌بێت و ئه‌م وڵاته‌ ده‌بێته‌ وڵاتێكی خاوه‌ن سه‌روه‌رییه‌كی ته‌واو و ئاسایش و ئارامی به‌خۆیه‌وه‌ ده‌بینێت، چونكه‌ سه‌روه‌ریی پێشێلكراوه‌، هه‌روه‌ها ئه‌و كاته‌ بێت كه‌ عێراق خاوه‌ن ئابوورییه‌كی باش بێت و بتوانێت هێزه‌كانی خۆی ته‌واو تۆكمه‌ بكات، ئێستا عێراق زۆر پێویستی به‌ ئه‌مریكایه‌. له‌ لایه‌نی سوننه‌كانیشه‌وه‌ زۆر داوای مانه‌وه‌ی ئه‌مریكییه‌كان له‌ عێراق ده‌كه‌ن نه‌ك به‌ته‌نها وه‌كو پێویستیی بزانن، به‌ڵكو به‌رگریی له‌ مانه‌وه‌ی هێزه‌كانی ئه‌مریكا ده‌كه‌ن. له‌نێو شیعه‌كانیشدا كۆده‌نگی له‌سه‌ر ده‌ركردنی هێزه‌كانی ئه‌مریكا نییه‌، به‌ڵكو چه‌ند هێزێكی سیاسیی شیعی له‌گه‌ڵ مانه‌وه‌ی ئه‌و هێزانه‌ن، به‌ڵام هه‌ندێكی دیكه‌شیان وه‌كو كاردانه‌وه‌یه‌ك له‌گه‌ڵ ئه‌وه‌ن ئه‌و هێزانه‌ی ئه‌مریكا له‌ عێراق ده‌ربكرێن و ئه‌مه‌ به‌پێی یاسا بێت".
كۆتایی ساڵی رابردوو، ماڵپه‌ڕی گڵۆباڵ ریسێرچی ئه‌مریكی بڵاویکردەوە کە ویلایه‌ته‌ یه‌كگرتووه‌كانی ئه‌مریكا 800 بنكه‌ی سه‌ربازیی له‌ جیهاندا هه‌یه‌ له‌نێویاندا شه‌ش بنكه‌ی سه‌ره‌كی له‌ عێراق هه‌یه‌.

به‌پێی سایته‌كه‌، ئه‌مریكا له‌ ساڵی 2014 رێككه‌وتنێكی سه‌ربازیی له‌گه‌ڵ حكوومه‌تی هه‌رێمی كوردستان واژووكردووه‌ بۆ دامه‌زراندنی پێنج بنكه‌ی سه‌ربازیی كه‌ به‌مشێوه‌یه‌ دابه‌شبوون؛ بنكه‌یه‌ك له‌ نزیك شنگال، یه‌كێكی دیكه‌ له‌ ناوچه‌ی ئه‌تروش و هه‌ریر، سه‌رباری دوو بنكه‌ی دیكه‌ له‌ هه‌ڵه‌بجه‌ و سلێمانی، هه‌روه‌ها بنكه‌یه‌كیش له‌ پردێ، هێمای بۆ ئه‌وه‌شكردووه‌ كه‌ بنكه‌ی سه‌ربازیی رینج وه‌كو سه‌ربازگه‌یه‌كی نموونه‌ییه‌ بۆ مه‌شق و پێگه‌یاندنی سه‌ربازی.
هه‌روه‌ها راپۆرتی ئه‌و ماڵپه‌ڕه‌ هێمای بۆ ئه‌وه‌كردووه‌، ئه‌مریكا له‌ ناحیەی گه‌یاره‌ سه‌ربه‌ پارێزگای نه‌ینه‌وا بنكه‌یه‌كی سه‌ربازیی گه‌وره‌ی هه‌یه‌ كه‌ ده‌كه‌وێته‌ فڕۆكه‌خانه‌ی سه‌ربازیی گه‌یاره‌وه‌ و له‌ پارێزگای ئه‌نباریش، ویلایه‌ته‌ یه‌كگرتووه‌كانی ئه‌مریكا دوو بنكه‌ی سه‌ربازیی هه‌یه‌ یه‌كێكیان به‌ناوی "عێن ئەلئەسەد" له‌ قه‌زای به‌غدادی و ئه‌وی دیكه‌شیان له‌ ناوچەی حه‌بانییه‌، ئه‌وه‌ سه‌رباری سه‌ربازگه‌یه‌ك له‌ قەزای به‌له‌د سەربە پارێزگای سه‌ڵاحه‌ددین كه‌ له‌ بنكه‌ی به‌له‌دی ئاسمانیدایه‌ و به‌ بنكه‌یه‌ك بۆ كۆنتڕۆڵكردنی فڕینی فڕۆكه‌كانی F-16 داده‌نرێت، هاوكات بنكه‌یه‌كی دیكه‌ی سه‌ربازیشی له‌ قەزای تاجی باكووری به‌غدا هه‌یه‌. له‌ پایته‌ختی عێراقیش راپۆرته‌كه‌ ئه‌وه‌ی روونكردووه‌ته‌وه‌ كه‌ بنكه‌ی ڤیكتۆری "سه‌ركه‌وتن" له‌ سنووری فڕۆكه‌خانه‌ی نێوده‌وڵه‌تی به‌غدا هه‌یه‌ و بۆ سه‌ركردایه‌تیكردن و كۆنتڕۆڵ و لێپێچینه‌وه‌ و زانیاریی هه‌واڵگریی به‌كارده‌هێنرێت.
به‌رپرسی ناوچه‌ی باكووری عێراق له‌ رێكخراوی به‌در، محه‌مه‌د مه‌هدی به‌یاتی كه‌ رێكخراوه‌كه‌ی یه‌كێكه‌ له‌ گرووپه‌ دیاره‌كانی نێو هێزه‌كانی حه‌شدی شه‌عبی و زیاتر له‌ 25 هه‌زار چه‌كداری هه‌یه‌ له‌ لێدوانێكدا بۆ ئاژانسی ئانادۆڵو رایگەیاند "بوونی هێزه‌كانی ئه‌مریكا له‌ پێشتر و ئێستاشدا پێویسته‌ په‌یوه‌ست بێت به‌ یاساوه‌، قبوڵ ناكه‌ین و قابیلی قبوڵكردنیش نییه‌ ئه‌مریكا عێراق داگیر بكات و هێزه‌كانی بهێنێته‌ عێراقه‌وه‌ دوای ئه‌و كشانه‌وه‌ سه‌رشۆڕییه‌ی له‌ سووریا روویداوه‌، ئه‌مه‌ نابێت رووبدات به‌بێ گه‌ڕانه‌وه‌ بۆ ده‌وڵه‌تی عێراق و سه‌ركردایه‌تی گشتی هێزه‌ چه‌كداره‌كان، ئه‌مه‌ سه‌رشۆڕییه‌ بۆ گه‌لی عێراق ئه‌گه‌ر وا بكه‌ن، به‌هیچ رێگه‌یه‌ك نابێت هێزه‌كانی ئه‌مریكا به‌دڵی خۆیان بێنه‌ نێو هه‌ولێر و بچنه‌ به‌غدا و بچنه‌ كه‌ركووك یان هه‌ر شوێنێكی دیكه‌، ئێمه‌ رێگه‌ ناده‌ین و قبوڵیشی ناكه‌ین ئه‌مریكا ئه‌و شوێنه‌ی ده‌یه‌وێت دیاری بكات كه‌ لێی ده‌مێنێته‌وه‌، ئه‌م پرسه‌ پێویستی به‌ یاسا و رێگه‌یه‌كی دیاریكراوه‌ بۆ هه‌بوونیان، ئه‌گه‌ر ئێمه‌ی عێراقییه‌كان خۆمان داوامان كرد".
محه‌مه‌د مه‌هدی به‌یاتی گوتی: "پڕوپاگه‌نده‌ش هه‌یه‌ گوایه‌ ئه‌مریكییه‌كان خۆیان داعش ده‌هێنن له‌ هه‌ندێك ناوچه‌ و دواتریش داوامان لێ ده‌كه‌ن داوای هاوكارییان لێ بكه‌ین بۆ ئه‌وه‌ی بێن و یارمه‌تییمان بده‌ن، ئه‌مه‌ پێویستی به‌ چاره‌سه‌ركردن هه‌یه‌ ئه‌م كێشه‌یه‌".
ئه‌و به‌رپرسه‌ی رێكخراوی به‌در له‌درێژه‌ی قسه‌كانیدا گوتیشی: "هێزه‌كانی ئه‌مریكا پێش كشانه‌وه‌یان له‌ عێراق له‌ ساڵی 2011 له‌ سه‌ربازگه‌ی كه‌یوان نزیك به‌ هه‌زار كه‌س ده‌بوون وه‌كو سه‌رباز و راوێژكار و ئه‌فسه‌ر، به‌ڵام له‌ میانی ئه‌م دوو مانگه‌ی دواییدا ژماره‌ی ئه‌و هێزانه‌ گه‌یشتووه‌ته‌ سێ بۆ چوار هه‌زار سه‌رباز له‌ هه‌موو هێزه‌ جیاوازییه‌كانیان، ئه‌و هێزانه‌ش پێمان وایه‌ ئه‌و هێزانه‌ن كه‌ له‌ سووریاوه‌ كشانه‌وه‌ته‌وه‌".
سه‌باره‌ت به‌ ژماره‌ی هێزه‌كانی ئه‌مریكا له‌ عێراق ئه‌و به‌رپرسه‌ ئاماژه‌ی بۆ ئه‌وه‌شكرد كه‌ زانیارییه‌كانی ئه‌وان هێما بۆ بوونی هێزه‌كانی ئه‌مریكا له‌ شه‌ش سه‌ربازگه‌ ده‌كات له‌ عێراق كه‌ له‌ چوار سه‌ربازگه‌ به‌هاوبه‌شی له‌گه‌ڵ هێزه‌كانی هاوپه‌یمانان و دوو سه‌ربازگه‌شیان سه‌ربه‌خۆیه‌، ژماره‌ی هێزه‌كانی ئه‌مریكاش له‌ عێراق به‌پێی زانیارییه‌كانی ئێمه‌ ده‌گاته‌ له‌ نێوان هەشت بۆ 10 هه‌زار سه‌رباز، ئه‌مانه‌ بۆ هاوكارییكردنی هێزه‌كانی عێراق نه‌هاتوون، چونكه‌ ئێمه‌ پێویستمان پێیان نییه‌ بۆ ئه‌وه‌ی له‌ داعش بمانپارێزن، به‌ڵكو ئێمه‌ داعشمان تێكشاند و ئه‌وه‌ی ماوه‌ لێره‌ و له‌وێ چه‌ند داعشێكی كه‌م ماون و جاروبار هێرش ده‌كه‌ن و ئێمه‌ خۆمان چاره‌سه‌ریان ده‌كه‌ین".
چه‌ند رۆژی رابردوو كۆلێژی جه‌نگ له‌ ویلایه‌ته‌ یه‌كگرتووه‌كانی ئه‌مریكا نهێنێی له‌سه‌ر 30 هه‌زار لاپه‌ڕه‌ له‌ به‌ڵگه‌نامه‌كانی په‌یوه‌ست به‌ داگیركردنی عێراق له‌ ساڵی 2003 تا كشانه‌وه‌ لێی له‌ 2011دا، هه‌ڵگرت. به‌پێی به‌ڵگه‌نامه‌كان جه‌نگی عێراق ئه‌و جه‌نگه‌ی ئه‌مریكا بوو كه‌ زۆرترین خه‌رجیی ئه‌و وڵاته‌ی تیادا كراوه‌ له‌وه‌تی جه‌نگی ڤیێتنام، به‌پێی توێژینه‌وه‌كه‌ ژماره‌ی سه‌ربازه‌ كوژراوه‌كانی ئه‌مریكا له‌ عێراق گه‌یشتووه‌ته‌ چوار هه‌زار و 487 سه‌رباز، ئه‌وانه‌شی به‌ هۆی كرده‌وه‌ سه‌ربازییه‌كانه‌وه‌ پێكرابوون گه‌یشتبوویه‌وه‌ 32 هه‌زار سه‌رباز و ئه‌فسه‌ر.
له‌ درێژه‌ی قسه‌كانیدا ئه‌ندامی لێژنه‌ی ئاسایش و به‌رگریی ئەنجوومەنی نوێنەرانی عێراق، هەرێم كه‌مال ئاغا سه‌باره‌ت به‌و لیسته‌ی له‌ دوای سه‌ردانه‌كه‌ی ئه‌مدواییه‌ی وه‌زیری ده‌ره‌وه‌ی ئه‌مریكا بۆ عێراق له‌ راگه‌یاندنه‌كانه‌وه‌ بڵاوكرایه‌وه‌ گوایه‌ ناوبراو به‌ سه‌رۆكوه‌زیران عادل عه‌بدولمه‌هدی دابێت بۆ ئه‌وه‌ی چه‌كه‌كان له‌ 67 گرووپی چه‌كداریی شیعه‌كان وه‌ربگرێته‌وه‌ گوتی: "دوای ئه‌وه‌ی به‌دواداچوونمان بۆ كرد هیچ شتێكی راستیی نییه‌ و ئه‌وه‌شی باس ده‌كرێت وا نییه‌ و هیچ لیستێك به‌حكوومه‌تی عێراق نه‌دراوه‌".
سه‌باره‌ت به‌ ناڕه‌زاییه‌تییەكان له‌ هه‌ڵسوكه‌وتی هه‌ندێك له‌ گرووپه‌كانی حه‌شدی شه‌عبیش، هه‌رێم كه‌مال ئاغا رایگه‌یاند "پێشتر و ئێستاش گله‌یی له‌و هێزانه‌ هه‌یه‌ كه‌ له‌ ده‌ره‌وه‌ی وه‌زاره‌تی به‌رگری و ناوخۆن كه‌ ره‌فتاره‌كانیان له‌ زۆر شوێن دژی یاسایه‌، گله‌یی زۆریش هه‌یه‌، بۆیه‌ ئه‌و هێزانه‌ی له‌ ده‌ره‌وه‌ی وه‌زاره‌تی به‌رگریین كۆده‌نگییه‌ك هه‌یه‌ یان بچنه‌ سه‌ر وه‌زاره‌تی به‌رگریی یان بچنه‌ سەر وەزارەتی ناوخۆ، یان خانه‌نشین بكرێن، ئه‌مه‌ له‌نێو لایه‌نه‌كانی شیعه‌ش زۆر قسه‌ی له‌سه‌ر ده‌كرێت، ئه‌مه‌ كورد و سوننه‌ و به‌شێكی شیعه‌ش پێی باشه‌، ئه‌م پرسه‌ كۆده‌نگی شه‌قامیشی پێویسته‌ و له‌ چه‌ند ناوچه‌یه‌ك به‌مدواییه‌ داوای كۆنتڕۆڵكردنی ئه‌و هێزانه‌یان ده‌كرد".
ئەو هه‌روه‌ها گوتیشی: "بۆ زیاتر جێبه‌جێكردنی یاسا گرنگه‌ كه‌ بمانه‌وێت وڵاتێكی مه‌ده‌نی وسه‌قامگیرتر دروست بكه‌ن، ئه‌وه‌ جگه‌ له‌وه‌ی ئاسانه‌ وڵاتانی دیكه‌ ئه‌م گرووپانه‌ بقۆزرێنه‌وه‌ و به‌كاربهێنرێن، هه‌روه‌ها ئه‌مریكا كه‌ خوێنێكی زۆری به‌خشیوه‌ و به‌ئاسانی رازی نابێت به‌وه‌ی كه‌ عێراق ته‌سلیمی چه‌ند گرووپێكی چه‌كداری بكات، راسته‌ ئه‌و گرووپانه‌ له‌ شه‌ڕی داعش خوێن و قوربانیی زۆریان داوه‌، بۆ ئه‌وه‌ی رێز له‌و قوربانییه‌ بگیرێت پێویسته‌ ئه‌و هێزانه‌ رێكبخرێنه‌وه‌ و بخرێنه‌ سه‌ر وه‌زاره‌تێك بۆ ئه‌وه‌ی تێكه‌ڵ بكرێنه‌وه‌".
راپۆرتێكی ماڵپه‌ڕی "لیۆرك وێل"ی ئه‌مریكی سه‌ره‌تای مانگی رابردوو بڵاویکردەوە، وه‌زاره‌تی بەرگری ئه‌مریكا، چوار هه‌زار و 475 بنكه‌ی سه‌ربازیی هه‌یه‌ له‌ 50 ویلایه‌ت و هه‌شت هه‌رێم و 45 وڵاتی بیانی، ئاماژه‌ی بۆ ئه‌وه‌شكردووه‌ كه‌ پنتاگۆن ژماره‌یه‌ك بنكه‌ی سه‌ربازیی له‌ عێراق ده‌شارێته‌وه‌، هه‌روه‌ها ئه‌مریكا 514 بنكه‌ی سه‌ربازیی له‌ ده‌ره‌وه‌ی وڵات هه‌یه‌.
سه‌باره‌ت به‌ ئه‌گه‌ری كردنه‌ئامانجی حه‌شدی شه‌عبی له‌ لایه‌ن هێزه‌كانی ئه‌مریكا یان مووشه‌كه‌كانی ئیسرائیل وه‌كو دزه‌پێكردنه‌كانی نێو راگه‌یاندنه‌كان باسیان لێوه‌كردووه‌ گوایه‌ له‌ سه‌ردانه‌كه‌ی ئه‌مدواییه‌دا وه‌زیری ده‌ره‌وه‌ی ویلایه‌ته‌ یه‌كگرتووه‌كانی ئه‌مریكا هۆشداریی داوه‌ته‌ به‌رپرسانی عێراق له‌وه‌ی ئه‌وان به‌رپرسیار نابن ئه‌گه‌ر هێزه‌كانی ئیسرائیل حه‌شدی شه‌عبی له‌نێو عێراق بكه‌نه‌ ئامانجی مووشه‌كه‌كانیان، به‌رپرسی ناوچه‌ی باكووری عێراق له‌ رێكخراوی به‌در، محه‌مه‌د مه‌هدی به‌یاتی رایده‌گه‌یه‌نێت "ئه‌مریكا یان ئیسرائیل ئه‌گه‌ر ئاره‌زووی ئه‌وه‌ ده‌كه‌ن كه‌ جه‌نگی جیهانیی سێیه‌م رووبدات ئه‌وه‌ ئه‌و ره‌فتار و هه‌ڵسوكه‌وته‌ ده‌كه‌ن، به‌ڵام عێراقییه‌كان ئازادن و رێگه‌ به‌ بوونی ئه‌مریكا و هیچ گورزێكی ئیسرائیل ناده‌ین بۆسه‌ر هێزه‌كانی عێراق و ئه‌گه‌ر شتێكی وا رووبدات ئه‌وا وه‌ڵاممان ده‌بێت".
محه‌مه‌د مه‌هدی به‌یاتی هه‌روه‌ها ئه‌وه‌شی گوت "تا ئێستا پێمان رانه‌گه‌یه‌ندراوه‌ كه‌ ئیسرائیل نیازی مووشه‌كبارانكردنی هێزه‌كانی حه‌شدی شه‌عبیی هه‌بێت، ئه‌گه‌ر شتێكی ئاوا یان هه‌ڕه‌شه‌یه‌كی له‌و جۆره‌ هەبێت ئه‌وا به‌دڵنیایییه‌وه‌ ئێمه‌ پشت ئه‌ستووریین به‌هێزه‌كانمان و وه‌ڵامیان ده‌ده‌ینه‌وه‌".