یونیسێف: ''لە نێجیریا ٢٥٧ بنکەی تەندروستی و قوتابخانە بەهۆی لافاوەوە رووخاون''

ئەبوجا - AA

سندوقی هاوکاری منداڵان سەربە نەتەوە یەکگرتووەکان (UNICEF)، ئاماژەی بەوە کرد کە بەهۆی بارانی بەخوڕ و دروستبوونی لافاو لە ویلایەتی جیگاوای نێجیریا، ٢٥٧ بنکەی تەندروستی و قوتابخانە رووخاون.

کارمەندی مەیدانیی یونیسێف، رەحمان محەمەد فەراح باسی لەوە کرد کە بەهۆی بەردەوامی باران بارین و دروستبوونی لافاوەوە، زیانی ماددی کەوتووەتەوە.

رەحمان محەمەد فەراح باسی لەوە کرد کە بەهۆی لافاوەوە لە ویلایەتی جیگاوا، ٢٣٠ بنکەی تەندروستی و ٢٧ قوتابخانە رووخاون.

کارمەندی مەیدانیی یونیسێف، رەحمان محەمەد فەراح هەروەها باسی لەوە کرد کە بەهۆی لافاوەکەوە، سەدان کەس دەربەدەربوون و رایگەیاند: ''زۆربەی ئەو کەسانە پەنایان بردووەتە بەر ئەو قوتابخانە و بینا حکوومییانەی زیانیان بەرنەکەوتووە. ئەو کەسانە رووبەڕووی نەخۆشییەکانی مەلاریا و سکچوون بوونەتەوە''.

لە ئاکامی کارەساتەکانی لافاو کە لە مانگی ئایارەوە تا ئێستا بەردەوامە، ٦٠٣ کەس گیانیان لەدەستداوە و یەک ملیۆن ٣٠٠ هەزار کەسیش ئاوارە و دەربەدەر بوون.