حکوومەتی عێراق پێکھێنانی ھێزێکی خۆجێی بۆ پاراستنی قەزای شنگال راگەیاند

ھەولێر ــ AA

حکوومەتی عێراق رایگەیاند کە ھێزێک لە دانیشتوانی شنگال رۆژئاوای پارێزگای نەینەوا باکووری ئەو وڵاتە پێکھێنراوە کە دۆسیەی ئەمنی سەنتەری قەزاکە بەڕێوەدەبات.

لەمبارەیەوە راوێژکاری ئاسایشی نەتەوەیی عێراق، قاسم ئەعرەجی لە لێدوانێکدا بە کەناڵی نیمچە فەرمی عێراقییەی راگەیاندووە کە ھێزەکە، دوو ھەزار و ٥٠٠ کەسە کە سەرجەمیان نیشتەجێی شنگالن و ئەرکی وەرگرتنی دۆسیەی ئەمنی سەنتەری قەزاکە دەبێت.

تا ئێستا ھێزە ھاوبەشەکانی سوپای عێراق و پۆلیسی فیدراڵیی، دۆسیەی ئەمنی شنگال بەڕێوەدەبەن.

قاسم ئەعرەجی وردەکاری زیاتری لەبارەی ئەو ھێزە نوێیەی کە پێکھێنراوە نەخستووەتەڕوو، بەڵام وەزارەتی بەرگریی عێراق لە تشرینی یەکەمی ساڵی رابردوو رایگەیاندبوو کە ھێزێک لە دانیشتوانی قەزای شنگال پێکدەھێندرێت کە ئەرکی پاراستنی ئاسایشی سەنتەری قەزاکە دەبێت و ھێزەکانی سوپا و پۆلیسی فیدراڵییش پاراستنی ئاسایشی دەرەوەی قەزای شنگال دەگرنە ئەستۆ.

راوێژکاری ئاسایشی نەتەوەیی، قاسم ئەعرەجی لەبارەی رێککەوتنەکەی شنگال لەنێوان حکوومەتی فیدراڵیی و حکوومەتی ھەرێمی کوردستان ئاماژەی بەوەداوە کە ئەو رێککەوتنە، رێککەوتنێکی دادپەروەرانەیە و گوتی: "ناتوانیین رێککەوتنێک بکەین کە جێگای رەزامەندی ھەمووان بێت".

رۆژی نۆی تشرینی یەکەمی ساڵی رابردوو، حکوومەتی فیدراڵ و حکوومەتی ھەرێمی کوردستان لەسەر ئاساییکردنەوەی دۆخی شنگال و دروستکردنی ئیدارەیەکی نوێ بۆ قەزاکە رێککەوتن.

بەپێی رێککەوتنەکە، ئیدارەیەکی ھاوبەش لەنێوان حکوومەتی فیدراڵ و حکوومەتی ھەرێم لە شنگال دروست دەکرێت و دۆسیەی ئەمنیی شارەکە بە پۆلیسی خۆجێی و پاراستنی دەرەوەی شارەکەش بە سوپای عێراق و پێشمەرگە دەسپێردرێت و سەرجەم گرووپە چەکدارییە نایاساییەکان دەچنە دەرەوەی سنووری قەزاکە.

لە ماوەکانی رابردوودا قایمقامی قەزای شنگال، مەحما خەلیل رایگەیاندبوو کە ھێشتا چەکدارانی پەکەکە لە قەزای شنگال-دان کە ئەوەیش پێچەوانەی بەندەکانی نێو رێککەوتنەکەی نێوان بەغدا و ھەولێرەوە سەبارەت بە ئاساییکردنەوەی رەوشی قەزای شنگال.