كۆمه‌ڵی ئیسلامی: "ده‌نگنه‌دانمان په‌یوه‌ندیی به‌یاسا و سیسته‌مه‌وه‌ هه‌یه‌"

هه‌ولێر-AA

فراكسیۆنی كۆمه‌ڵ ده‌نگی به‌ هیچ كاندیدێكی سه‌رۆكی هه‌رێم نه‌دا له‌ دانیشتنه‌كه‌ی ئه‌مڕۆی په‌رله‌مان كه‌ نێچیرڤان بارزانی 68 ده‌نگی له‌كۆی 81 په‌رله‌مانتاری ئاماده‌بووی دانیشتنه‌كه‌ به‌ده‌ست هێنا.

سه‌رۆكی فراكسیۆنی كۆمه‌ڵی ئیسلامی له‌ په‌رله‌مانی كوردستان عه‌بدولستار مه‌جید له‌ كۆنگره‌یه‌كی رۆنامه‌وانییدا تایبه‌ت به‌ پرسی ده‌نگنه‌دانی فراكسیۆنه‌كه‌ به‌ سه‌رۆكی هه‌رێم كه‌ ئه‌مڕۆ په‌رله‌مانی كوردستان دانیشتنی تایبه‌تی بۆ سازكرد و تێیدا نێچیرڤان بارزانی به‌ 68 ده‌نگ پۆسته‌كه‌ی بۆ خۆی مسۆگه‌ركرد، رایگه‌یاند "ئه‌مڕۆ ئێمه‌ وه‌كو فراكسیۆنی كۆمه‌ڵی ئیسلامی ده‌نگمان به‌هیچ كاندیدێك نه‌دا، هه‌ڵوێستی ئێمه‌ و قه‌ناعه‌ته‌كانی ئێمه‌ په‌یوه‌ندیی به‌كه‌سه‌كانه‌وه‌ نییه‌، په‌یوه‌ندیی به‌ سیسته‌م و یاساكانه‌وه‌ هه‌یه‌".
کۆمەڵی ئیسلامی لە پەرلەمانی کوردستان خاوه‌نی حه‌وت كورسییە.
عه‌بدولستار مه‌جید گوتیشی: "ئێمە كه‌ بڕیارمان داوه‌ سیسته‌م په‌رله‌مانی بێت پێویستە ئه‌وه‌ به‌ كرده‌یی ره‌نگ بداته‌وه‌، ئه‌وه‌مان نه‌بینی، هه‌روه‌ها ده‌سه‌ڵاتێكی زۆر به‌ سه‌رۆكی هه‌رێم دراوه‌ له‌م یاسایه‌ی ئێستا و هیچ به‌پرسیارێتییه‌كی له‌به‌رده‌م په‌رله‌مان و خه‌ڵكیش نییه‌، بۆیه‌ یاسایه‌ك كه‌ دژی بووین و ده‌نگمان بۆ نه‌داوه‌ نه‌ ده‌نگ بۆ سه‌رۆكی هه‌رێم ده‌ده‌ین و نه‌ كاندیدمان بۆی هه‌بوو".

سەرۆکی فراکسیۆنی کۆمەڵی ئیسلامی هه‌روه‌ها گوتیشی "ده‌بوو ده‌نگدان به‌نهێنی بێت كه‌ عورفه‌، ئێمه‌ وه‌كو فراكسیۆنی كۆمه‌ڵی ئیسلامی خاوه‌نی به‌ڵێن و قسه‌كانی خۆمانین كه‌ كاتی خۆی به‌ڵێنمان له‌سه‌ر داون و پاشه‌كشه‌ له‌ هه‌ڵوێسته‌كانی خۆمان ناكه‌ین و هه‌ر شتێك یاسا شكێنی بێت و به‌رژه‌وه‌ندیی هاووڵاتییان و دامه‌زراوه‌كانی هه‌رێم بێت له‌گه‌ڵی نابین تا كۆتایی".

سه‌رۆكی فراكسیۆنی كۆمه‌ڵی ئیسلامی عه‌بدولستار مه‌جید له‌درێژه‌ی قسه‌كانیدا بۆ راگه‌یاندنه‌كان سه‌باره‌ت به‌ بایكۆتكردنی یه‌كێتی بۆ دانیشتنه‌كه‌ی ئه‌مڕۆی په‌رله‌مانی كوردستان ئه‌وه‌شی گوت "ئه‌و هات و هه‌رایه‌ په‌یوه‌ندیی به‌وانه‌وه‌ هه‌یه‌ كه‌ رێككه‌وتنیان كردووه‌ و كوردستانییان به‌م ئاڕاسته‌یه‌ بردووه‌ و به‌و شێوه‌یه‌ كاریان كردووه‌".