لە ڕووداوێکی هاتوچۆدا لە بەسرە شەش قوتابی گیانیان لەدەستدا

ھەولێر ــ AA

وەزارەتی تەندروستیی عێراق ڕایگەیاند کە لە ڕووداوێکی هاتوچۆدا لە پارێزگای بەسرە، شەش قوتابی گیانیان لەدەستداوە و ١٠ی دیکەش برینداربوون و ھاوکات وەزارەتی ناوخۆی عێراق ڕایگەیاند، ئەو کەسەی کە ھۆکاری ڕووداوەکە بووە دەستگیرکراوە.

وەزارەتی تەندروستیی عێراق لە ڕاگەیاندراوێکدا، ئاماژەی بەوەداوە کە لە پارێزگای بەسرە بارھەڵگرێک لە ژمارەیەک قوتابی داوە و لە ئاکامدا، شەش قوتابی گیانیان لەدەستداوە و ١٠ی دیکەش برینداربوون.

لای خۆیەوە گوتەبێژی وەزارەتی ناوخۆی عێراق، میقداد میری لە ڕاگەیاندراوێکدا ئاماژەی بەوەداوە کە لە پاریزگای بەسرە، شۆفێری بارھەڵگرێک دەستگیرکراوە کە لە ژمارەیەک قوتابی داوە و لە ئاکامدا، شەش قوتابی گیانیان لەدەستداوە.

ڕاشیگەیاندووە کە بەپێی ئەنجامی لێکۆڵینەوە بەراییەکاندا، شۆفێری بارھەڵگرەکە دانی بەوەداناوە کە بەھۆی ئەوەی برێکی بارھەڵگرەکەی تێکچووە و کۆنترۆڵی لەدەستداوە و دواتر ڕووداوەکەی لێكەوتووەتەوە.