ھەرێمی کوردستان.. کەناڵی KNN کۆتایی بە پەخشی خۆی دەھێنێت

سلێمانی ـ AA

ئەمڕۆ پێنجشەممە کەناڵی تۆڕی ھەواڵی کوردی (KNN) ی سەر بە بزووتنەوەی گۆڕان کۆتایی بە پەخشی خۆی دەھێنێت و لە پەیامێکدا سوپاسی ‌خەڵک و بینەران و کارمەندانی دەکات کە لەچەند ساڵی رابردوودا بینەری کەناڵەکە بوون.

پەیجی فەڕمی کەناڵەکە بڵاوی کردووەتەوە، لە کۆبوونەوەیەکی بەرفراوانی کارمەندانی کەناڵەکە بە ئامادەبوونی بەڕێوەبەری جێبەجێکاری کۆمپانیای وشە و بەڕێوەبەری گشتی کەناڵی KNN، دیدی نوێ و پێگەی میدیای کوردی تاوتوێ کرا و بڕیاری داخستنی کەناڵەکە بە سەرجەم ستافی کەناڵەکە راگەیاندرا.

کەناڵەکە رایگەیاندووە کە "ئەمشەو ٢٦ لەسەر ٢٧ی ٩ی ٢٠١٩ کاتژمێر ٠٨.٠٠ کەناڵی تۆڕی ھەواڵی کوردی (KNN)، پاش ١٠ ساڵ و ٩ مانگ، کۆتایی بە پەخشی خۆی دەھێنێت.

KNN سوپاسی ‌خەڵکی کوردستان و بینەران و کارمەندانی دەکات، کە لەچەند ساڵی رابردودا بینەر و ھاوکاری بوون و رادەگەیەنێ کە لە ئێستادا کۆمپانیای وشە (کۆمپانیایەکی بواری راگەیاندنە و پێشتر لەلایەن رێکخەری کۆچکردووی گۆڕان، نەوشیروان مستەفا دامەزراوە) لە ئامادەکاریدایە بۆ بەرەوپێشبردن و ئەنجامدانی کارەکانیان لە بواری رۆژنامەوانی بەشێوەیەکی باشتر.