سێیەم رۆژی فێستیڤاڵی گەلاوێژ تایبەتە بە یەشار كەمال

سلێمانی

ئەم فێستیڤاڵە لەلایەن بنكەی رووناكبیریی گەلاوێژ لە ژێر دروشمی (بیرە بوێرەكان مەشخەڵی رۆشنگەرین) ئەنجام دەدرێت و ماوەی پێنج رۆژ بەردەوام دەبێت.

یەكێك لە تەوەرەكانی گرنگی فێستیڤاڵی ئەمساڵ، سێیەم رۆژی فێستیڤاڵەكەیە كە ئەمڕۆ دەستی پێ كرد و بریتییە لە تەرخان كردنی بۆ رۆماننووسی كۆچكردوو یەشار كەمال كە بە ئامادەبوونی خاتوو ئایشە بابانی هاوسەری بەڕێوە دەچێت.

كارەكانی ئەمڕۆی فێستیڤاڵ تایبەتە بە ئەدەب و كلتووری توركی ـ كوردی بەناونیشانی نووسەری ناودار یەشار كەمالەوە، تێیدا چەندین لێكۆكینەوە لەلایەن نووسەرانی تورك و كوردەوە دەربارەی یەشار كەمال و ئەدەبیاتەكەی پێشكەش دەكرێت و سێ‌ پانێڵ لە خۆ دەگرێت.

پانێڵەكانی پێش نیوەڕۆ بریتین لە :ـ

ـ ئەدەبیاتی توركی ـ تێڕوانینێكی گشتی لەلایەن دۆكان ئاكهانلی

.ـ ئەدەبیات لە رۆژانی كارەساتدا لەلایەن یاوز ئەكینجی

.ـ وێنەی كورد لە رۆمانی توركیادا لەلایەن موسلیم یوجەك

.ـ ئاراستە و ئەگەرەكانی ئەدەبیاتی هاوچەرخ و شوێنی ئەدەبیات لە ژیانی كۆمەڵایەتیدا لەلایەن بولەنت ئوستا.

لە پانێڵی دووەمدا لەسەر ئەدەبیاتی یەشار كەمال چەند بابەتێك پێشكەش دەكرێن، كە بریتین لە :ـ

ـ گوتەیەك دەربارەی یەشار كەمال لەلایەن ئایشە بابانەوە.ـ مۆدێلی ئەدەبیاتی یەشار كەمال: گەرمای زەرد ـ گڕە لەلایەن ئایشە گوڵ توزەن.ـ پۆرترێتی یەشار كەمال بە رەنگ لەلایەن ئەحمەد گوینەشتەكین .

لە پانێلی سێیەمی فێستیڤاڵەكەی ئەمڕۆدا، چەند بابەتێكی دیكە پێشكەش دەكرێن لەسەر یەشار كەمال :ــ چاوەڕوانی لای یەشار كەمال لەلایەن موسلیم یوجەل.ـ تێڕوانینی یەشار كەمال بۆ زمانی كوردی لەلایەن بەكر شوانی.ـ باگراوندەكانی ئەپستمیان لە گوتاری رۆماننوسی یەشار كەمال .

لە كۆتایی فێستیڤاڵەكەی ئەمڕۆشدا فیلمێكی دۆكیۆمێنتاری بە ناوی (دەنگی خاك ـ یەشار كەمال )پێشكەش دەكرێت.

بەڕێوەبەری كۆڕەكانی ئەمڕۆ بەكر شوانی گوتی: "چوار ساڵ پێشتر یەشار كەمال بانگهێشتكرابوو بۆ كوردستان، بەڵام بەهۆی نەخۆشییەكەیەوە نەیتوانی ئەو سەفەرەی بكات، بۆیە بە راوێژ لەگەڵ بنكەی گەلاوێژ گەیشتە ئەو بڕیارەی ئەمساڵ رۆژێك دیاری بكرێت بۆ ئەدەبیاتی توركی و یەشار كەمالەوە بەو پێیەی رۆڵێكی گەورەی لە ئەدەبیاتی توركیدا بینیوە".

شوانی گوتی: "ئەوە بۆ دەستپێكردنی سەرەتایەكی ئەدەبی و كلتووری و لە نێوان هەردوو میللەتدا و نزیككردنەوەی نووسەرانی كورد و توركە".

بە گوێرەی چاپەمەنییەكانی تایبەت بە فێستیڤاڵەكە ئایشە سەمیحە گوێگچەلی هاوسەری یەشار كەمال لە گوتارەكەیدا باس لەوە دەكات هاوسەرەكەی پێشتر زۆر حەزی دەكرد بهاتایەتە شاری سلێمانی و بەشداری فێستیڤاڵەكەی بكردایە، بەڵام باری تەندروستی رێگەی پێنەداوە كە دواتر بەو هۆیەوە كۆچی دوای كرد.

رۆژی چوارەمی فێستیڤاڵەكە كە سبەی یەكشەممە بەڕێوە دەچێت تایبەت دەبێت بە میوانانی فارس و عەرەب بۆ پێشكەشكردنی بابەتەكانیان. كۆتا رۆژی فێستیڤاڵ، تایبەتە بە لێكۆڵینەوەكانی كوردی بەشدار لە پێشبڕكێی فێستیڤاڵ و چەند لێكۆڵینەوەیەكی دیكەی كە وەك میوان بەشداری فێستیڤاڵ دەكەن.

پاشنیوەڕۆی هەمان رۆژ، رێوڕەسمی كۆتایی فێستیڤاڵ بەڕێوە دەچێت و بە پێشكەشكردنی چەند وتارێك و هەڵسەنگاندنی بابەتەكان و دابەشكردنی خەڵاتی یەكەم و دووەم و سێیەمی فێستیڤاڵ كارەكانی بە كۆتا دێت.

فێستیڤاڵی گەلاوێژ، فێستیسڤاڵێكی رووناكبیرییە و بنكەی رووناكبیریی گەلاوێژ ساڵانە لە وەرزی پایزدا لە شاری سلێمانی بەڕێوەی دەبات، تا ئێستا هەژدە فێستیڤاڵی بە ئەنجام گەیاندووە و جگە لە نووسەرانی نێوخۆ، نووسەرانی بیانی لە ئێران‌ و توركیا و وڵاتانی عەرەبی ‌و ئەورووپاوە بانگێشت دەكرێن .

لە كۆتایییشدا خەڵاتی یەكەم تا سێیەم، بۆ شیعر و چیرۆك‌ و لێكۆڵینەوە دابەش دەكرێت.