Почина легендарниот фолк-пејач Халид Бешлиќ

САРАЕВО (АА) - Легендарниот фолк-пејач Халид Бешлиќ почина денес на 72-годишна возраст, по кратка и тешка борба со болеста, јавува Анадолу.

Кон крајот на август Бешлиќ беше хоспитализиран во Клиничкиот центар на Универзитетот во Сараево откако се соочи со здравствени проблеми за време на концертот во Бања Лука.

Последните недели од животот тој беше примен на онколошкиот оддел, каде што се бореше со здравствени компликации од кои не успеа да закрепне.

Халид Бешлиќ е роден на 20 ноември 1953 година во Кнежина кај Соколац.

Со уникатниот глас и емотивните песни тој остави неизбришлив белег на музичката сцена на поранешна Југославија и пошироко.

Во текот на кариерата, која траеше повеќе од четири децении, создаде голем број хитови што станаа евергрини на фолк-музиката.

Неколку недели пред смртта тој објави емотивна песна посветена на неговата сопруга Сејда, која со години ја истакнуваше како најголема поддршка во животот и кариерата.

Заминувањето на Халид Бешлиќ остави празнина во срцата на милиони обожаватели, но и неизбришливо наследство во музичката историја на Балканот.