Во БиХ пристигнаа првите вакцини на „БајоНТех“/„Фајзер“ од механизмот Ковакс

САРАЕВО (АА) - На Меѓународниот аеродром „Сараево“ денеска се доставени вакцините на „БајоНТех“/„Фајзер“, кои Босна и Херцеговина ги купи во рамките на механизмот Ковакс, јавува Агенција Анадолија (АА).

Во контингентот се наоѓаат 23.400 дози на вакцината на „БајоНТех“/„Фајзер“. Ова е прва испорака за БиХ преку глобалниот механизам Ковакс, но и најголема од почетокот на пандемијата на коронавирусот.

Министерката за цивилни работи на БиХ, Анкица Гудељевиќ, изјави дека овие вакцини ќе бидат проследени до ентитетите и до дистриктот Брчко.

„Оваа вакцина ќе биде проследена до ентитетите, односно до Република Србија, Федерацијата на БиХ и до дистриктот Брчко. Ние веќе ја подготвивме и ја доставивме документацијата за царината што побрзо да ја заврши својата работа и за вакцината што побрзо да го напушти аеродромот“, изјави Гудељевиќ, додавајќи дека вечерва би требало да пристигнат и 26.400 дози на вакцината на „АстраЗенека“.

„Искрено се надевам дека во наредниот период остатокот од вакцините ќе пристигнат во редовни интервали и количества кои ќе ги задоволат потребите на Босна и Херцеговина“, изјави Гудељевиќ, и додаде:

„На сите нас сакам да посакам многу сила и трпение за да го издржиме овој предизвик и оваа чума што нѐ снајде. Се надеваме дека вакцините кои пристигнаа ќе помогнат во таа борба и дека ќе видиме подобри денови.“

Таа изрази очекување дека БиХ во наредниот период ќе добие поголемо количество вакцини од ова кое пристигна денеска.

Шефот на делегацијата на Европската Унија во ЕУ и специјален претставник на ЕУ за БиХ, амбасадорот Џохан Сатлер, истакна дека оваа испорака на вакцините е клучна за почетокот на процесот на закрепнување.

„Ова е прва од низата испораки кои ќе дојдат во рамките на механизмот Ковакс за кој средства во целост обезбеди БиХ, односно домашните власти, и покрај одредените глобални застои поради недостигот. БиХ е втора земја на Западен Балкан, која еве, добива испораки од вакцините во рамките на механизмот Ковакс. Секако дека станува збор за важен и добар ден за БиХ. Мојата втора порака е дека механизмот Ковакс воопшто не би постоел без донации од целата низа на донатори, пред сѐ, Европската комисија и земјите членки на ЕУ, како Германија и други кои заеднички обезбедиле 2,2 милијарди евра. Мојата трета порака е дека оваа пандемија зема данок и на граѓаните и на оваа земја. Доаѓањето на овие вакцини претставува трошка надеж и е клучно за почетокот на процесот на закрепнување“, изјави Сатлер.

Постојаната координаторка на ОН во БиХ, Ингрид Мекдоналд, изјави дека е многу важно БиХ да ги добие вакцините преку механизмот Ковакс.

„Упатуваме најискрени честитки до Министерството за цивилни работи, бидејќи знам дека тоа се луѓе кои неуморно работеа до денеска за да ја имаме оваа испорака на вакцините. БиХ се придружи на механизмот Ковакс како една од земјите која сама го платила своето учество и испораката на вакцините“, изјави Мекдоналд.

Босна и Херцеговина преку механизмот Ковакс нарача 1,2 милиони дози вакцини.