Zlatan Kapic
22 Октомври 2025•Ажурирај: 23 Октомври 2025
БЕЛГРАД (АА) – Претседателот на Србија, Александар Вучиќ, денес изјави дека пред Народното собрание во Белград се случил „тежок терористички акт“, јавува Анадолу.
„Се обраќам прв и се извинувам што ќе морам да го напуштам овој настан, бидејќи пред Народното собрание се случи тежок терористички акт, што ќе треба подетално да го разгледам во текот на денот“, рече Вучиќ во обраќањето во Палатата на Србија по повод доделувањето некои грантови.
Утринава избувна пожар во населбата со шатори пред српскиот Парламент во Белград, каде што престојуваат поддржувачи на актуелната Влада, а пред тоа се слушна истрел во кој едно лице е повредено, јавија локалните медиуми.
Полицијата уапси едно лице во врска со инцидентот.
Во меѓувреме, подоцна, во вонредниот говор што Вучиќ претходно го најави, рече дека станува збор за „политички мотивиран терористички чин“.
„Почитувани граѓани на Србија, денес пред Домот на Народното собрание на Република Србија, Анѓелковиќ Владан, роден 1955 година во Белград, со регистрирано живеалиште во Општина Стари Град, изврши - ова е моја политичка проценка и како правно лице - ужасен терористички напад врз други луѓе и туѓ имот и предизвика општа опасност“, изјави Вучиќ.
Тој додаде дека конечното правно формулирање и квалификација на делото ќе го дадат надлежните обвинителства.
Вучиќ рече дека напаѓачот имал регистрирано оружје - пиштол - во посед од 1993 година.
За време на обраќањето на Вучиќ, беше емитувана снимка од местото на нападот, како и изјава од уапсениот Анѓелковиќ, кој рече дека не ги познава луѓето што биле таму, но дека сакал полицијата да му го одземе животот бидејќи, како што рече, повеќе не може да живее.
Според неофицијални информации од локалните медиуми, пукањето се случило во еден од шаторите, кога едно лице испукало неколку куршуми кон друго лице, погодувајќи го во ногата.
Повредениот беше пренесен во Ургентниот центар, а напаѓачот беше уапсен.
По инцидентот, пред Парламентот беа распоредени голем број полицајци, меѓу кои и припадници на Специјалната антитерористичка единица (САЈ).
Шаторите биле поставени пред неколку месеци пред институциите во Белград, а во нив се противници на блокадите и протестите започнати по уривањето на натстрешницата на Железничката станица во Нови Сад на 1 ноември минатата година, во кое загинаа 16 лица.
