Германија и Австрија му забранија влез во земјата на Додик, лидерот на босанските Срби

БЕРЛИН (АА) - Германското Министерство за надворешни работи објави дека австриската министерка за надворешни работи Беате Мајнл-Рајзингер и германската државна министерка за Европа и клима Ана Лирман, во Сараево разговарале за ситуацијата во Босна и Херцеговина, известува Анадолу.

На средбата се разговарало за уставната криза предизвикана од сепаратистичките акции на администрацијата на Република Српска.

Во соопштението се наведува дека Мајнл-Рајзингер и Лирман се согласиле итно да се преземат чекори против виновниците за уставната криза, а тоа ѝ го пренеле и на претседателката на Советот на министри на Босна и Херцеговина, Борјана Кришто.

Во соопштението се наведува дека Австрија и Германија во тесна координација со другите европски партнери ќе преземат решителни чекори против политичарите одговорни за ентитетот Република Српска, додавајќи дека по ова прашање се преземени мерки во иднина да се спречи влезот на тројцата одговорни политичари на РС во Австрија и Германија.

Истакнувајќи дека Додик ги подигнал своите сепаратистички провокации и дејствија на ново ниво и јасно ги преминал законските црвени линии, министерката Мајнл-Рајзингер нагласи дека на тој начин Додик ги загрозил безбедноста, стабилноста, уставниот поредок и територијалниот интегритет на Западен Балкан.

Мајнл-Рајзингер рече дека повеќе нема да прифаќаат такво однесување.

Посочувајќи дека иднината на Босна и Херцеговина е во Европската Унија (ЕУ), Мајнл-Рајзингер истакна дека сакаат да ги уверат сите проевропски сили дека ќе продолжат активно да ги поддржуваат во нивните напори да постигнат членство на Босна и Херцеговина во ЕУ.

Посочувајќи дека одговорните за нападите врз уставниот поредок на Босна и Херцеговина го загрозуваат мирот, безбедноста во регионот и иднината на Босна и Херцеговина во ЕУ, германската државна министерка Лирман го рече следното:

„Од таа причина нашите мерки се насочени токму кон овие луѓе.“

Повикувајќи ги сите одговорни во земјата да се вратат на патот на реформите во ЕУ и да ги преземат следните чекори на тој пат, Лирман истакна:

„Босна и Херцеговина припаѓа на ЕУ, и Германија ќе продолжи да биде на страната на Босна и Херцеговина.“

Од друга страна, во вестите објавени од австрискиот јавен сервис ОРФ се наведува дека министерката Мајнл-Рајзингер во изјавата дадена во Сараево рекла дека на прорускиот сепаратистички претседател на РС, Додик, и на двајца политичари од РС ќе им биде забранет влез во Германија и Австрија.