Гордана Силјановска-Давкова - прва жена претседател на Северна Македонија

СКОПЈЕ (АА)

Државната изборна комисија (ДИК) на Северна Македонија ги објави неофицијалните податоци за 99 отсто од избирачките места од вчерашните претседателски и парламентарни избори, според кои двоен победник е ВМРО-ДПМНЕ, јавува Анадолу.

Според првичните податоци што ги објави Државната изборна комисија (ДИК), врз основа на 99,96 отсто преброени гласови, на претседателските избори кандидатката на ВМРО-ДПМНЕ, Гордана Силјановска-Давкова, успеа да освои 65,15 отсто од гласовите, а кандидатот на СДСМ, Стево Пендаровски, освои 29,25 отсто од гласовите.

Врз основа на овие податоци, Силјановска-Давкова, која ќе биде прва жена претседател на државата, успеала да собере 560.744 гласа, а Пендаровски 251.755 гласа.

Бројот на неважечки ливчиња на претседателските избори одржани вчера е 48.261.

Според првичните податоци објавени на веб-страницата на ДИК, од вкупно 1.814.317 гласачи, на претседателските избори учествувале 860.760 граѓани или 47,46 отсто од бројот на гласачи. Со ова е постигнат условот за учество од 40 проценти за да се сметаат изборите за валидни.

- Поголем одѕив на парламентарните избори

Во однос на парламентарните избори, на кои кандидатите се натпреваруваа за 120 пратенички места во законодавниот дом, ДИК соопшти дека од 99,6 отсто преброени гласови ВМРО-ДПМНЕ има обезбедено 58 пратенички мандати, коалицијата Европски фронт 19 мандати, СДСМ 18 мандати, коалицијата ВРЕДИ (ВЛЕН) 13 мандати, Левица шест мандати и Движењето ЗНАМ шест мандати.

Одѕивот на гласачите на парламентарните избори е поголем во однос на претседателските. Правото на глас на парламентарните избори го искористиле вкупно 997.596 лица или 55,36 отсто од избирачите.

- Претседателот во заминување го призна поразот, опозицијата ја слави победата

Претседател во заминување Стево Пендаровски синоќа го призна поразот и ѝ честиташе на опозицијата за двојната победа.

Во меѓувреме, претседателот на ВМРО-ДПМНЕ, Христијан Мицкоски, синоќа изјави дека победи Македонија и дека ова е историска победа на народот.

Тој истакна дека за брзо време ќе започне преговори со другите опозициски партии за формирање на „најдобрата коалиција и Влада“.

Во текот на денот се очекува ДИК да ги утврди прелиминарните изборни резултати и да ги објави првичните резултати.

Потоа партиите учесници на изборите имаат право да поднесат приговори до ДИК за постапката на гласање во рок од 48 часа по завршувањето на гласањето и приговори за постапката на сумирање и утврдување на резултатите во рок од 48 часа по објавувањето на првичните резултати.