Vesna Besic
06 Јули 2023•Ажурирај: 09 Јули 2023
ВИСОКО (АА) - Ковчезите со посмртните останки на жртвите од геноцидот извршен во јули 1995 година во Сребреница, Босна и Херцеговина, се подготвени за колективниот погреб на 11 јули годинава на гробиштата на Меморијалниот центар во Сребреница - Поточари, јавувa Анадолу.
Оваа година на гробиштата на Меморијалниот центар во Поточари ќе бидат погребани посмртните останки на 30 жртви на геноцидот извршен 1995 година врз жителите на „заштитената зона на ОН“ во Сребреница. Постои можност тој број да биде поголем за уште една жртва на геноцидот.
Директорот на ЈП Градски гробишта Високо, Џенан Шабановиќ, рече дека сите активности поврзани со испраќањето на ковчезите од Високо се одвиваат според утврдената динамика.
„Екипите веќе се во Меморијалниот центар. Веќе 20 години посмртните останки на убиените жители на Сребреница си заминуваат од Високо, односно пред Градските гробишта, а оваа традиција продолжува и годинава. Сѐ се одвива според планот. Во тек е ископот на гробовите во Поточари. Подготвени сме за евентуални врнежи. Во недела во 10 часот е планирано испраќањето. Оваа година имаме и погреб на татко и син“, изјави Шабановиќ за Анадолу.
Имено, станува збор за таткото и синот Вејсил и Хасиб Мујановиќ. Меѓу жртвите што годинава ќе бидат погребани ќе има и четири малолетници. Најмладата жртва што ќе биде погребана годинава е момчето Елвир Салчиновиќ, кој имал 15 години кога бил убиен. Тој е убиен во областа Баљковица, а неговите останки беа ексхумирани од масовната гробница Липља кај Зворник во 2001 година.
Иако беше идентификуван уште во 2011 година, неговото семејство не најде сила да го погребе Елвир до оваа година. Последниот мир ќе го најде со татко му Турабија и братот Алмир, кои беа погребани во Поточари во 2003 и 2011 година.
Ќе бидат погребани и двајца 16-годишници, Мустафа Меканиќ и Есед Клемпиќ. Нивните останки беа ексхумирани во текот на 2001 година на различни локации, на подрачјето на Глогова и Каменица. Тие беа идентификувани и во претходните години - 2008 и 2013 година, но дури сега добивме согласност за нивно погребување. Уште еден малолетник ќе најде конечен мир, а тоа е Семир Ѓозиќ. Имал 17 години кога е убиен, а неговите посмртни останки се ексхумирани во 2002 година.
Незир Муминовиќ е најстара жртва на геноцидот во Сребреница што ќе биде погребана оваа година. Во моментот кога бил убиен имал 65 години, а неговите посмртни останки биле ексхумирани во областа Каменица во 2007 година.
Секоја година, по колективниот погреб на жртвите од геноцидот во Сребреница во 1995 година, во Поточари се врши реексхумација на претходно закопаните жртви со цел да се додадат посмртните останки што подоцна се пронајдени.
Годинава ќе се отвори 71 гроб. Во просториите на проектот за идентификација Подриње има околу 400 останки што, исто така, го чекаат процесот на реексхумација и реасоцијација.
„Нашиот тим ќе остане во Поточари и по погребот бидејќи се планираат повторни ексхумации - околу 70 гробници ќе бидат повторно отворени бидејќи дополнително се пронајдени посмртните останки“, појасни Шабановиќ.
