Нуредини: Прогласувањето на Шар Планина за национален парк е историски успех

СКОПЈЕ (АА) - Министерот за животна средина и просторно планирање на Северна Македонија, Насер Нуредини, го оцени како историски успех прогласувањето на дел од Шар Планина за национален парк, јавува Агенција Анадолија (АА).

Нуредини на прес-конференција потсети дека законот со кој се прогласува дел од Шар Планина за национален парк, односно заштитено подрачје од втора категорија, беше изгласан од Собранието минатата недела, а дека оваа недела законот е потпишан од претседателот Стево Пендаровски.

Нуредини истакна дека ова е четврти национален парк во Северна Македонија, но дека тој е првиот прогласен по независноста на земјата.

Според него, ова е голем чекор со кој се обезбедуваат големи придобивки за природата, но и за идните генерации.

„Со донесувањето на овој закон се става под заштита и се овозможува создавање на систем за одржливо управување со областа, што е богатство на биодиверзитетот, дом на 2/3 од сите растителни видови во Северна Македонија, на богата ендемична флора и фауна“, нагласи Нуредини.

Тој рече дека вкупната површина на паркот е 62.705 хектари, поделена на три заштитни зони. Тој исто така додаде дека е предвиден „заштитен појас“ на туристичкиот центар „Попова Шапка“ со цел негов одржлив развој.

Нуредини понатаму додаде дека во согласност со законот, Владата на Северна Македонија мора да формира јавна институција за националниот парк во рок од три месеци.

Тој, исто така, рече дека меѓународните експерти во соработка со локалните жители работат на изготвување план за управување, што ќе ги дефинира активностите што се дозволени и забранети, како и нивниот временски рок.