Пендаровски: „Крајно опасни се идеите за промена на границите на Балканот"

БРИСЕЛ

Генералниот секретар на НАТО, Јенс Столтенберг, изјави дека не го погледнал „нон-пејперот“ за промена на границите на Балканот, што наводно словенечкиот премиер Јанез Јанша му го испратил на претседателот на Европскиот совет, Шарл Мишел, при што истакна дека шпекулациите околу промена на границите придонесуваат за неизвесност и создаваат ризик од нестабилност во регионот, јавува Агенција Анадолија (АА).

Столтенберг и претседателот на Северна Македонија, Стево Пендаровски, дадоа изјави за медиумите по нивната средба во седиштето на НАТО во Брисел.

Одговарајќи на прашањето за наводниот „нон-пејпер" што го подготвила Словенија, Столтенберг изјави дека ги видел вестите во врска со документот и додаде: „Не можам да коментирам документ што не сум го видел. Важно е следното: Шпекулациите околу промена на границите придонесуваат за неизвесност и создаваат ризик од нестабилност во регионот. Секоја шпекулација во врска со тоа би била бескорисна. Безбедноста и стабилноста на Западен Балкан се важни за НАТО. Тоа е важно и од аспект на безбедноста и на регионот и на Европа. НАТО на различни начини ја поддржува стабилноста на регионот.“

Столтенберг, истакна дека НАТО ќе продолжи да работи на стабилноста заедно со своите членки и партнери од регионот.

„Конструктивниот дијалог и почитувањето на меѓународно признаените граници се најдобриот начин да се постигне стабилност и безбедност во регионот“, рече Столтенберг.

- Пендаровски: „Авторите на ова се срамат од сопственото мислење“

Претседателот на Северна Македонија, Стево Пендаровски, ги опиша како „крајно опасни“ идеите за промена на границите на Балканот.

Потсетувајќи на неговите разговори со лидерите на земјите од ЕУ и членките на НАТО, Пендаровски рече: „Би сакал да го истакнам ова. Никој, ама никој не ги поддржува ваквите документи. Фактот дека нивните автори не се јавно познати е доказ дека дури и тие се срамат од овие идеи.“

„Само оние кои дури и не успеваат да ги поддржат националните интереси на граѓаните на нивната земја создаваат такви документи“, нагласи Пендаровски, додавајќи дека тие што го подготвиле документот се оние што сметаат дека просперитетот ќе дојде кога луѓето ќе бидат поделени на етничка основа.

Во документот, чија содржина беше објавена во вестите во словенечките медиуми, беше откриено дека Босна и Херцеговина треба да биде поделена и дека Република Српска (РС), еден од двата ентитета на Босна и Херцеговина, треба да се спои со Србија. Исто така во документот стои дека Косово и Албанија треба да се спојат.

Документот подготвен на англиски јазик со наслов „Западен Балкан - патот напред“ не е официјален став на Словенија.

Се тврди дека тоа е „решение“ за проблемите со кои се соочува поранешна Југославија.

Во „нон-пејперот" се нагласува дека членството на Босна и Херцеговина во ЕУ треба да биде одбиено и дека Турција ќе има корист од јазот во регионот, особено во Босна и Херцеговина и Северна Македонија.