Потпретседателот на Собранието, Милошоски, се сретна со специјалниот претставник на унгарскиот премиер за Западен Балкан

СКОПЈЕ (АА) - Потпретседателот на Собранието на Северна Македонија, Антонијо Милошоски, оствари работна средба со Жолт Бунфорт, специјален претставник за Западен Балкан на премиерот на Унгарија, Виктор Орбан, придружуван од Ѓула Шомоѓи, советник, и Јулијана Армаш, советник, како и заменик-шефот на мисијата, Атила Фодор, пренесува Анадолу.

Според соопштението од Собранието, на средбата била потврдена одличната македонско-унгарска соработка и подготвеност за понатамошно унапредување на односите на двете држави во повеќе области.

„Беше потенцирана заложбата за интензивирање на соработката во економската област преку реализирање на заеднички проекти, како и зближување на двата народа преку зајакнување на пријателските односи и културната размена“, се наведува во соопштението.

Од друга страна, специјалниот претставник за Западен Балкан, Бунфорт, според соопштението, ја потенцирал поддршката на Унгарија кон македонските ЕУ-интеграции, истакнувајќи дека членството во ЕУ не претставува награда, туку признание за реформските напори и остварениот напредок во изминатиот период.