Сакеларопулу: „Европската перспектива на Западен Балкан е приоритет за Грција“

БЕЛГРАД (АА) - Претседателката на Грција, Катерина Сакеларопулу, денеска во Белград по средбата со претседателот на Србија, Александар Вучиќ, изјави дека европската перспектива на Западен Балкан е стратешки приоритет за Грција, јавува Анадолу.

„Сметаме дека Западен Балкан е дел од Европа. Проширувањето ќе обезбеди мир и безбедност во оваа област и ќе го спречи влијанието на трети страни кои имаат желба да интервенираат на ова подрачје од свои причини“, рече Сакеларопулу на прес-конференција, додавајќи дека тоа би било повеќекратна придобивка и за Западен Балкан и за иднината на Европската Унија.

Таа истакна дека Грција отсекогаш сметала дека Србија припаѓа на европското семејство и изрази цврст став за потребата Србија да влезе во ЕУ.

Вучиќ оцени дека двете земји „имаат повеќе од пријателски, сестрински односи“, додека Сакеларопулу оцени дека билатералните односи се исклучителни, стабилни и ненарушени речиси 150 години и дека целта е да се забрза имплементацијата на Стратегијата за стратешко партнерство во областа на енергетиката, туризмот, културата и одбраната.

Сакеларопулу рече дека таа и Вучиќ разговарале за развојот на настаните поврзани со дијалогот меѓу Белград и Приштина и истакна дека го поддржува тој дијалог, чија цел е нормализирање на односите и изнаоѓање одржливо решение кое ќе обезбеди стабилност на Балканот и движечка сила за европскиот пат на Србија.

„Ги поддржуваме неодамнешните разговори кои се однесуваат на спроведувањето на планот за имплементација и подобрувањето на вашата позиција во Европа. Нашиот став во однос на Косово останува непроменет и стабилен“, изјави Сакеларопулу и додаде дека Грција е подготвена да им помогне и на Белград и на Приштина.

На прашањето дали имало притисок Грција да ја признае независноста на Косово, таа рече дека притисок секогаш има, но дека тоа не ја засега Грција.

Претседателката на Грција посочи дека прашањето за спроведување на анексот на договорот за нормализација на односите сега е дел од европскиот пат на Србија и дека неговото спроведување од Приштина ќе придонесе за севкупните напори за одржување на безбедноста и стабилноста на Западен Балкан.

Таа на конференцијата посочи дека рускиот упад во Украина е неоправдан и дека сите мора да се борат за мир, а аспирациите за проширување на територијата се за осуда и немаат место во Европа во 21 век.

Таа се осврна и на грчко-турските односи и рече дека тензиите се намалени бидејќи Грција сака да одржува добрососедски односи со целосно почитување на меѓународното право.

Вучиќ на прес-конференцијата рече дека почитувањето на меѓународното јавно право е многу важно за Србија и дека „Грција го поддржува територијалниот интегритет на Србија, така што Србија го поддржува интегритетот на Хеленската Република и на копно и на море и на островите и во воздух, и тоа нема да се промени“.

Тој додаде дека на средбата со грчката претседателка јасно зборувал за важноста да се бара компромисно решение со Приштина, но го повторил и она што Србија нема да го направи, односно кои се црвените линии.

„Мораме да ги зачуваме мирот и стабилноста во регионот и тоа е наш витален интерес. Во наш витален интерес е да го забрзаме нашиот европски пат. Ѝ се заблагодарив за поддршката на Србија на европскиот пат, што се трудеа да ѝ помогнат на нашата земја дури иако тоа не беше лесно“, рече Вучиќ.

Нагласи дека многу работи што Србија треба да ги направи на патот кон ЕУ се поврзани со дијалогот со Приштина и дека Србија со радост работи на реформите.

Вучиќ истакна дека размената на стоки и услуги меѓу Србија и Грција е околу 1,46 милијарди евра.