Србија: Уште 13 лица починаа од Ковид-19

БЕЛГРАД

Во Србија во последните 24 часа од Ковид-19 починаа 13 лица, а регистрирани се 344 новозаразени, од 8.659 тестирани, јавува Агенција Анадолија (АА).

Министерот за здравство, Златибор Лончар на прес-конференцијата изјави дека до сега се активни 4.574 случаи, а дека 170 лица се на респиратор.

Тој изјави дека заразени се повеќе од 500 здравствени работници, а дека поголемиот дел се на домашно лекување, а 70 заболени се лекуваат во болница.

Вкупниот број на починати е 418.

Лончар наведе дека вчера во амбулантите за Ковид-19 во Белград биле прегледани 3.225 пациенти и дека се потполнети повеќе од 90 отсто на капацитетите во сите болници.

Директорот на Инфективната клиника на Клиничкиот центар на Србија, Горан Стевановиќ изјави дека клиничката слика на пациентите е потешка и хоспитализацијата трае подолго отколку во првиот пик во март и април, додавајќи дека просечната возраст е меѓу 30 и 50 години.

Стевановиќ изјави дека најмногу заболува популацијата која што најмногу се движи, а тоа е работно активното население.