Средба Вучиќ - Зарацин: Зачувување на мирот, јакнење на довербата и посеопфатна регионална соработка

БЕЛГРАД (АА) - Српскиот претседател Александар Вучиќ денес во Белград го прими специјалниот пратеник на сојузната Влада на Германија за државите од Западен Балкан, Мануел Зарацин, со кого разговараше за ситуацијата во регионот и, меѓу другото, за исходот од вчерашниот состанок во Брисел и во таа пригода изјави дека Белград останува посветен на дијалогот со Приштина, кој се води со посредство на Европската Унија, јавува Анадолу.

Вучиќ го повтори ставот на Србија во поглед на сите прашања на Западен Балкан - зачувувањето на мирот, понатамошно зајакнување на довербата и посеопфатна регионална соработка.

Вучиќ истакна дека патот на евроинтеграциите е еден од надворешно-политичките приоритети на Србија и изрази надеж дека и ангажманот на специјалниот пратеник Зарацин дополнително ќе придонесе за обновување на ентузијазмот за проширување на ЕУ.

Соговорниците разговараа и за економската соработка, а особено за инвестициските потенцијали што се отвораат во контекст на организацијата на престижниот настан ЕКСПО 2027 во Србија. Вучиќ изрази интерес за проширување на германските инвестиции, со оглед на значењето на Германија како економски партнер на Србија.

Специјалниот пратеник Зарацин изрази желба за посилен ангажман на целата Европска Унија во однос на политиката на проширување и давање нов поттик на Западен Балкан на европскиот пат, се вели во соопштението од Кабинетот на претседателот на Србија.