Тошковски на Форумот на шефови на гранични полиции: Европската безбедност се гради заедно со Западен Балкан

Министерот за внатрешни работи на Северна Македонија, Панче Тошковски, изјави дека европската безбедност се гради преку соработка со Западен Балкан, нагласувајќи ја потребата од конкретни механизми за соработка во справувањето со миграциските и безбедносните предизвици, пренесува Анадолу.

Говорејќи на Форумот на шефови на гранични полиции од Западен Балкан, што на 26 и 27 август се одржува во Скопје во рамки на Берлинскиот процес, Тошковски рече дека миграцијата останува едно од клучните прашања на современото време и дека Западен Балкан истовремено е транзитен регион и значаен партнер во колективниот европски одговор.

„Притисоците од нерегуларните миграциски текови, експлоатацијата на ранливите категории од страна на криминалните мрежи и оптоварувањето на институциите не се предизвици ограничени на една граница, една земја или еден регион. Тие се европски и глобални“, рече Тошковски, нагласувајќи дека се потребни конкретни механизми за соработка.

Тој ја истакна и важноста на Берлинскиот процес, велејќи дека тој претставува пат преку кој земјите од Западен Балкан ја демонстрираат својата подготвеност и усогласеност со европските стандарди.

„Европската безбедност не завршува на надворешните граници на Европската Унија. Таа се гради преку стабилни и безбедни партнери, преку заеднички политики и преку способноста на сите нас да придонесуваме кон справувањето со предизвиците што ја засегаат Европа како целина“, истакна Тошковски.

Министерот рече дека Форумот треба да се искористи за утврдување заеднички приоритети, размена на искуства и продлабочување на соработката во областа на граничната безбедност и миграцијата.