Фицо: Црна Гора има историска можност, Словачка ја поддржува иницијативата „28 до 2028“

Словачка целосно ја поддржува амбицијата на Црна Гора до 2028 година да стане членка на Европската Унија (ЕУ), порача денес во Братислава словачкиот премиер Роберт Фицо по средбата со претседателот на Црна Гора, Јаков Милатовиќ, јавува Анадолу.

Фицо оцени дека Црна Гора има историска можност успешно да го заврши пристапниот процес и ја потврди поддршката на Словачка за иницијативата „28 до 2028“, според која Црна Гора би станала 28. членка на ЕУ.

Милатовиќ и Фицо разговараа за натамошно зајакнување на политичките и економските односи меѓу двете земји, инвестициите и конкретните проекти, продолжувајќи го разговорот започнат во јуни за време на Самитот на ЕУ и Западен Балкан во Тиват.

„Црна Гора е следната членка на Европската Унија. Нашата цел е до 2028 година да станеме 28. членка. Денес сме поблиску до тоа од кога било досега и сега е важно да го задржиме темпото на реформите и да го завршиме преговарачкиот процес“, рече Милатовиќ.

Тој му се заблагодари на Фицо за доследната поддршка на европскиот пат на Црна Гора, истакнувајќи дека политичките односи треба дополнително да се зајакнат преку инвестиции, деловни врски и заеднички проекти.

Посебно внимание беше посветено на економската соработка, вклучително и во енергетиката, сообраќајната инфраструктура, туризмот, земјоделството, ИТ-секторот и дигитализацијата.

„На Црна Гора ѝ се потребни квалитетни инвестиции, нови знаења и партнери подготвени за долгорочни проекти. Важно е политичките разговори да бидат проследени со конкретни следни чекори“, рече Милатовиќ.

Соговорниците разговараа и за продолжување на соработката по Деловниот форум на Црна Гора и Словачка, одржан минатата година во Подгорица, на кој учествуваа повеќе од 30 словачки компании.

Беше разгледана и следната седница на Мешовитата комисија за економска соработка, која треба дополнително да ги поврзе институциите и стопанствениците од двете земји.

Милатовиќ и Фицо позитивно ја оценија директната авиолинија меѓу Подгорица и Братислава, истакнувајќи го нејзиното значење за развојот на туризмот, деловните и другите контакти.

„Директната авионска поврзаност меѓу Подгорица и Братислава веќе придонесува за посилни туристички, деловни и други врски меѓу двете земји“, рече Милатовиќ.

Фицо, исто така, го поздрави планот на Црна Гора да отвори амбасада во Братислава, оценувајќи дека тоа дополнително би придонело за понепосредна соработка меѓу двете држави.