ИСТАНБУЛ (АА) – Кинескиот технолошки гигант Алибаба груп холдинг влезе во стратегиско партнерство со американската компанија Епл за развој на функции со вештачка интелигенција за уредите Ајфон во Кина, објави вчера „Саут Чајна морнинг пост“, јавува Анадолу.

Според извори запознаени со договорот, Епл се одлучил за Алибаба поради напредните способности на неговиот ВИ-модел Квен, кој се смета за високософистициран и водечки во областа на вештачката интелигенција.

Партнерството е склучено во време кога Епл се соочува со пад на продажбата на Ајфон во Кина, каде што недостигот на локални способности за вештачка интелигенција се смета за големо назадување.

Извршниот директор Тим Кук го припиша неодамнешниот пад на продажбата на Ајфон во Кина од 11 отсто на недостигот на Епл интелиџенс, а локалните конкуренти, како Хуавеј, брзо ја пополнија оваа празнина.

Во потрага по локален ВИ-партнер, Епл размислувал за стартапи, како ДипСик и БајтДенс, но на крајот се одлучил за Алибаба.

На 29 јануари Алибаба го претстави ажурираниот модел Квен 2.5, тврдејќи дека ги надминува конкурентите, вклучително и ДипСик-В3, кој е широко признат во индустријата. Овој развој е клучен за Епл бидејќи продажбата на Ајфон беше намалена за време на празниците, кој вообичаено е најсилен период за компанијата, поради недостигот на очекуваните карактеристики на вештачката интелигенција.

Челси Лам, аналитичарка на Морнингстар, изјави: „Партнерството меѓу Алибаба и Епл делумно ги потврдува способностите на Aлибаба во областа на вештачката интелигенција и Квен 2.5 Макс. Изборот на вистински партнер за испорака на квалитетно Епл интелиџенс искуство ќе им помогне да ја оживеат продажбата на Ајфон во Кина.“

„Иако деталите за комерцијалниот договор меѓу двете компании сè уште не се познати, најзначаен исход е тоа што Алибаба сега го има Епл како водечки партнер, што може да привлече дополнителни можности за соработка со други компании“, додаде таа.

Двете компании ги доставија функциите со вештачка интелигенција што ги развија за Ајфон во Кина на одобрување кај кинескиот регулатор за киберпростор.