Истражување: Најмалку 30 милијарди долари штета предизвикана од криминал со криптовалути во 2017-2022 година

ЖЕНЕВА (АА) - Кибернападите и измамите со криптовалути предизвикале штета од најмалку 30 милијарди долари низ светот од 2017 година, покажува новото истражување објавено денес, пренесува Анадолу.

Наведувајќи ги техничките слабости и манипулираните криптовалути како главни причини за загубите, истражувачите од „Complexity Science Hub“ со седиште во Виена, документираа вкупно 1.155 криминални инциденти поврзани со криптовалути во 2017-2022 година.

Тие вклучија 16 случаи во првата година од студијата, кои се зголемија на 435 случаи во 2022 година, според студијата, спроведена во соработка со Универзитетот во Монтреал и објавена на веб-страницата на „Complexity Science Hub“.

„Меѓутоа, тоа не значи дека не може да има повеќе случаи. Според тоа, сите наши резултати се минимум“, рече Бернхард Хаслхофер, шеф на истражувачката група за криптофинансирање во „Complexity Science Hub“, во соопштението за медиумите.

Убедливо најголемата документирана загуба е 3,6 милијарди долари и може да се проследи наназад до „Africrypt“, централизирана финансиска платформа со седиште во Јужна Африка.

Основачите се осомничени дека отишле во илегала со биткоин во вредност од 3,6 милијарди долари во јуни 2021 година.

Новиот проект на „Complexity Science Hub“, наречен „DeFi Trace“, треба да го олесни следењето на украдените средства во иднина.

Фокусот е првенствено на децентрализираните финансии (DeFi), форма на финансирање што не се потпира на давателите на централни финансиски услуги како брокери, берзи или банки, туку наместо тоа се заснова на блокчејн, дигитална финансиска технологија што користи повеќе заеднички книги.

Во нивниот нов проект, истражувачите сакаат да развијат методи кои овозможуваат автоматско следење на нелегалните текови на плаќања во секторот „DeFi“.

Меѓу спонзорите на проектот се три австриски министерства и органите за спроведување на законот на германската покраина Баварија.