Најголемиот светски производител на електрични возила БЈД гради фабрика во Туркије

ИСТАНБУЛ (АА) – Кинеската компанија БЈД (BYD), најголем светски производител на електрични возила, вчера потпиша договор со турското Министерство за индустрија и технологија за инвестиции во Република Туркије, јавува Анадолу.

Ресорното турско Министерство соопшти дека очекува БЈД да изгради фабрика во Туркије со капацитет за производство на 150.000 возила годишно, како и центар за мобилност и истражување и развој со вкупна инвестиција од една милијарда долари.

Се очекува компанијата да започне со производство на крајот на 2026 година и да отвори 5.000 работни места.

Договорот беше потпишан на церемонија на која присуствуваа турскиот претседател Реџеп Таип Ердоган, турскиот министер за индустрија и технологија Мехмет Фатих Каџир и претседателот и извршен директор на БЈД, Ванг Чуанфу.

Ердоган одвоено се сретна и со делегацијата на БЈД во Истанбул.

Туркије вчера најави и воведување дополнителен данок од 40 % за увезените возила од Кина, со цел да се зголеми уделот на домашното производство на турскиот пазар и да се поттикнат инвестициите.

Комисијата на Европската Унија најави и дополнителни царини за електричните возила од Кина.

Кинескиот производител на автомобили СВМ (SWM) вчера објави дека аплицира за изградба на фабрика во Република Туркије.