Abdula Berisha
24 Ноември 2022•Ажурирај: 25 Ноември 2022
СКОПЈЕ (AA) - Премиерот на Северна Македонија, Димитар Ковачевски, на прес-конференција информира за операционализација на владината одлука со која се обезбедува субвенционирана цена на електричната енергија за прехранбената индустрија, училиштата и водостопанствата кои работат со пумпни станици, јавува Агенција Анадолија (АА).
Премиерот Ковачевски изјави дека крајното влијание од оваа мерка, за која рокот на пријавување траеше до вчера, ќе биде стабилизирање и намалување на цените на финалните производи.
Тој истакна дека во услови на енергетска криза, на основните и средните училишта им е овозможено да склучат договори за снабдување со електрична енергија по цена од 95 евра за мегават/час, исто како и на водостопанствата.
„Од 477 јавни основни и средни училишта на државата, за субвенционирано снабдување се пријавиле 233 од сите градови. Од 70 јавни претпријатија од областа на водостопанството - собирање и одведување на урбани отпадни води и прочистување на отпадни води кои работат со пумпни или пречистителни станици, се пријавиле 50 субјекти“, рече Ковачевски.
Што се однесува до приватниот сектор, тој изјави дека се обезбедува струја по 80 евра за мегават/час за компаниите кои вршат производство на основните прехранбени производи, односно за компаниите кои произведуваат масло за јадење, леб и пекарски производи, брашно, млеко и млечни производи, како и за месната и живинарската индустрија.
„Од категоријата на физички и правни лица регистрирани во прехранбениот сектор, се пријавиле 235 субјекти. Субјектите кои не успеале да поднесат комплетни документи, во следниот период ќе можат да го сторат тоа и ќе бидат ставени на субвенционирано снабдување од 1 јануари“, рече Ковачевски.
Тој истакна дека Владата останува посветена на поддршката на граѓаните и компаниите, додавајќи дека со два пакети антикризни мерки се доделени вкупно 760 милиони евра.
На прес-конференцијата присуствуваа и министерот за економија, Крешник Бектеши и генералниот директор на компанијата „Електрани на Северна Македонија“ (ЕСМ), Васко Ковачевски.
Министерот Бектеши изјави дека цената за електрична енергија за компаниите е повеќе од двојно помала од цената на регулираниот пазар.
Сепак, тој рече дека од околу 1.000 субјекти кои можеле да добијат поевтина струја, се пријавиле 235 субјекти. И покрај тоа, тој рече дека очекува од 1 декември да има намалени цени на основните прехранбени производи, додавајќи дека Владата може да интервенира доколку тоа не се случи.
„Намалувањето за 10 отсто е реално согласно со сите анализи кои се направени од страна на Министерството за економија и другите институции“, рече Бектеши, додавајќи дека кај поголемиот дел од овие компании важи мерката за ограничена трговска маржа од 10 отсто.
Тој, исто така, изрази незадоволство од бројот на пријавени училишта, со оглед на фактот што не се пријавени ни половина од основните и средните училишта.
Директорот на ЕСМ, Васко Ковачевски, изјави дека уште се прават пресметки и нема прецизен податок колкаво ќе биде вкупното количество електрична енергија кое ќе треба да се обезбеди за новите категории на потрошувачи за кои се обезбедува субвенционирана цена на електрична енергија.
Тој потсети дека од претходно од Владата биле обврзани да ги снабдуваат речиси сите здравствени институции и голем дел од виталните институции на државата.
