Германија забележува пораст на дневниот број случаи заразени од коронавирусот на речиси рекордно ниво

БЕРЛИН (АА) - Дневните случаи на коронавирусот во Германија вчера се искачија на речиси рекордно високо ниво, откако властите предупредија дека новиот подвид на сојот Омикрон брзо се шири низ земјата, пренесува Агенција Анадолија (АА).

Институтот „Роберт Кох“ (RKI), агенција за контрола на болести во земјата, потврди 262.593 нови случаи со Ковид-19 во последните 24 часа и 269 смртни случаи поврзани со коронавирусот.

Бројката на нови случаи е само малку помала од бројката од минатиот четврток од 262.752 случаи, што е најголемата бројка досега.

Намалувањето на мерките против Ковид-19 минатиот месец и ширењето на високозаразната подваријанта на Омикрон, BA.2, беа главните фактори за зголемувањето на случаите.

Новата подваријанта, која е повеќе пренослива од почетниот сој на Омикрон, BA.1, сега опфаќа повеќе од 48 проценти од секвенционираните случаи на коронавирусот во земјата, според Институтот.

И покрај порастот на инфекциите, поголем дел од случаите на Омикрон досега беа благи, без потреба од хоспитализација.

Во вторникот, 2.070 пациенти се примени во болниците, додека речиси 2.300 пациенти со Ковид-19 се на лекување на одделенијата за интензивна нега (ICUs).

Според експертите, високата покриеност со вакцинација во Германија кај постарите лица е ефективна во спречувањето на тешки болести и смртни случаи од вирусот, и покрај новиот пораст од инфекции.

Околу 89 проценти од луѓето на возраст од 60 и повеќе години се целосно вакцинирани и 78 проценти од нив примиле и бустер доза, според најновите податоци.

Германија е помеѓу земјите најтешко погодени од пандемијата со коронавирусот во Западна Европа, една од земјите со највисок број на случаи во регионот, веднаш по Франција и Велика Британија.

Земјата од 83 милиони жители пријави околу 17,7 милиони инфекции и 126.142 смртни случаи од почетокот на пандемијата пред две години.