Експерт на СЗО кој ја посети Кина: „Епидемијата во Вухан во декември 2019-та била поголема од тоа што се мислеше“

ЊУЈОРК (АА) – Еден од експертите на Светската здравствена организација (СЗО), Питер Бен Ембарек, кој го истражуваше потеклото на новиот вид коронавирус (Ковид-19) во Кина, соопшти дека собрале наоди во Вухан дека размерите на епидемијата во декември 2019 година биле поголеми отколку што се мислеше, пренесува Агенција Анадолија (АА).

Ембарек, еден од експертите на СЗО кој го посети Вухан, Кина, во изјавата за телевизијата „Си-ен-ен“ рече: „Вирусот во Вухан во декември (2019) циркулирал нашироко, ова е ново откритие.“

Истакнувајќи дека по нивните проценки во декември 2019 година во Вухан биле заразени најмалку 1.000 лица, Ембарек рече дека собрале докази дека епидемијата во регионот била поголема отколку што се мислеше.

Тој наведе дека делегацијата се состанала со првиот заразен од Ковид-19 во Вухан на 8 декември 2019 година, и рече дека кинеските научници на делегацијата на СЗО им претставиле 174 примери на случаи со Ковид-19.

Посочувајќи дека ги испитале примероците земени од луѓе заразени во декември 2019 година во Вухан, Ембарек додаде дека оттаму се собрани 13 различни генетски низи на САРС КоВ-2.

Експертот на СЗО, исто така, повика да се дозволи итен пристап до стотици илјади примероци на крв за кои Кина досега не дозволила да се испитаат.