Венецуела во обид да го собори Гинисовиот рекорд за најголем оркестар во светот

АНКАРА (АА) - Венецуела вчера направи обид да го собори Гинисовиот светски рекорд за најголем оркестар во светот, со концерт на кој 12.000 деца и младинци го изведоа Словенскиот марш на рускиот композитор Петар Илич Чајковски, јавува Агенција Анадолија (АА).

Воената академија на Венецуела собра стотици виолини, виоли, контрабаси, дрвени и месингани дувачки инструменти, како и ударни инструменти, на кои илјадници музичари, главно деца и младинци, свиреа со една единствена цел: поставување рекорд за најголем оркестар во светот.

Музичарите, сите поврзани во мрежата на младински оркестри во земјата, го изведоа речиси 10-минутното музичко дело на отворено под будното око на независните надгледувачи чија задача беше да потврдат дека повеќе од 8.097 инструменти свират истовремено, за соборување на постоечкиот рекорд.

Настапот беше прикажан во живо на „Јутуб“ во Патио де Онор на Воената академија во комплексот Форт Тиуна во Каракас.

Телото на Гинисовите светски рекорди во рок од 10 дена ќе утврди дали е поставен рекорд. Изведбата ја набљудуваа над 250 супервизори.