Стинг на концертот во Варшава ја осуди војната во Украина и предупреди дека демократијата е во опасност

ВАРШАВА (АА) - Славниот британски музичар Стинг на кусо го прекина синоќешниот концерт во Варшава за да ја предупреди својата публика дека демократијата е нападната низ светот и да ја осуди војната во Украина, за која рече дека претставува апсурд заснован врз лаги, известува Агенција Анадолија (АА).

Го замоли популарниот полски актер Маќеј Штур да излезе на бината и да ја преведе неговата порака дека демократијата е во голема опасност да биде изгубена доколку луѓето не ја одбранат.

„Алтернатива на демократијата е затвор, затвор на умот. Алтернатива на демократијата е насилство, угнетување, затвор и молчење“, рече Стинг.

Овој 70-годишен музичар ја упати пораката во Полска, земја што се граничи со Украина, која е во војна со Русија. Полска стана засолниште за повеќе Украинци од која било друга земја.

„Војната во Украина е апсурд заснован врз лаги. Ако ја проголтаме лагата, лагата ќе нè изеде“, порача Стинг.

Публиката на националниот стадион во Варшава со овации ги поздрави зборовите на Стинг, а со особено силен аплауз ги поздрави неговите зборови дека демократијата е нешто неуредно и фрустрирачко, но дека за неа сепак вреди да се бори.

По своето обраќање, Стинг го продолжи концертот со песната „Fragile“, во чиј текст, меѓу другото, се вели дека „ништо не доаѓа од насилството и тоа никогаш ништо не можело“.