Казна затвор за браќата Беќири за „Фабриката за афери“

СКОПЈЕ (АА) - Во скопскиот Кривичен суд денеска беше изречена пресудата за случајот „Фабрика за афери“ за кој се обвинети браќата Захир и Имер Беќири за фалсификување на лични карти и документи, јавува Anadolu Agency (AA).

Захир Беќири Чауш е осуден на две години и шест месеци затвор и парична казна од 123.000 денари, додека неговиот брат Имер на една година затвор и 61.500 денари за случајот „лажни лични карти“.

До правосилност на пресудата, браќата Беќири од денеска се пуштени на слобода.

Обвинителството во завршните зборови побара затворски казни со тврдење дека обвинетите во домот имале цела работилница за изработка на фалсификувани документи.
Беќири во завршниот збор се изјасни дека не се чувствува виновен.