Почина словенечкиот режисер Томаж Пандур на проба во МНТ

СКОПЈЕ (АА) - За време на денешната проба за претставата „Крал Лир“ од Шекспир, во Мaкедонскиот народен театар во Скопје, на 52-годишна возраст почина истакнатиот словенечки и европски режисер Томаш Пандур, јавува Anadolu Agency (AA).

Режисерот познат по исклучителната естетика и провокативни и богати претстави, работеше низ цела Европа. Во Скопје дојде по турнејата низ Јужна Америка со словенечката претстава "Фауст".

Пандур беше исклучително плоден режисер чие творештво се темелеше на драмската класика на која ѝ пристапуваше со иклучително уникатен визуелен израз. Негови најпознати претстави се „Шехерезада“, „Тесла електрик компани“, „Хазардски речник“, „Хамлет“, „Медеја“ и многу други.

Последниве години Пандур живееше и работеше во Мадрид, каде ја основа и приватнaта театарска компанија „Pandur Theaters“.