Истражување: Климатските промени предизвикани од човекот доведоа до невидено затоплување на европските мориња

Екстремните температури на морето регистрирани околу Европа во јули би биле практично невозможни без климатските промени предизвикани од човекот, се вели во студија објавена денес, јавува Анадолу.

Истражувачите на Ворлд ведер Атрибјушн (WWA) ги испитувале Келтското Море, Бискајскиот Залив и Иберискиот Полуостров, како и западниот и источниот Медитеран.

Во јули се забележани највисоки температури на површината на морето во светот досега за тој месец, додека рекордни нивоа се измерени по должината на атлантскиот брег на Европа и во западниот Медитеран. Медитеранските води биле дури 6 Целзиусови степени над нормалата во јуни.

Набљудувањата покажаа дека температурите се зголемиле за 1,2 Целзиусови степени во Келтскиот Регион, 1,5 степени околу Бискајскиот Залив и Иберискиот Полуостров, 3,1 Целзиусов степен и во западниот Медитеран и 2,6 Целзиусови степени во источниот Медитеран.

Комбинирајќи ги набљудувањата со климатските модели, истражувачите припишале околу 2 Целзиусови степена затоплување во Медитеранскиот Регион на климатските промени предизвикани од човекот. Утврденото зголемување се проценува на 1,4°C во областа на Бискајскиот Залив и Пиринејскиот Полуостров и на 1,3°C во Келтскиот Регион.

Во Келтскиот Регион климатските промени ја зголемиле веројатноста за појава на ваков настан за околу 30 пати. Студијата покажува дека измерените температури во другите три региони би биле речиси невозможни во клима што е за 1,4°C постудена.

Доколку глобалните температури достигнат 2,8 Целзиусови степени над прединдустриските нивоа до крајот на векот, слични топлотни услови како оние забележани оваа година би можеле да бидат уште од 1,3 до 1,9°C потопли.

Ворлд ведер Атрибјушн (WWA) предупреди дека морските топлотни бранови може да предизвикаат масовни смртни случаи кај коралите, сунѓерите и макроалгите, нарушувајќи ги синџирите на исхрана и влијаејќи врз рибите, морските птици и морските цицачи.

Потоплите води, исто така, може да ги принудат видовите да се упатат кон север, да го сменат риболовот и аквакултурата, да ја зголемат влажноста и топлотниот стрес во крајбрежните области и да ги зголемат ризиците од болести што се пренесуваат преку вода и затворање на плажите поради медузи.

Истражувачите рекоа дека адаптацијата може да ја зајакне отпорноста, но не може целосно да ги компензира еколошките ефекти од континуираното океанско затоплување, нагласувајќи ја потребата за брз премин од фосилни горива.