ПАРИЗ (АА) - „Биполарен светски поредок би бил голема грешка“, изјави вчера претседателот на Франција, Емануел Макрон, известува Агенција Анадолија (АА).
Зборувајќи на маргините на конференцијата на Азиско-пацифичката економска соработка (АПЕК), Макрон рече дека таков свет, иако многумина го посакуваат, би бил грешка дури и кога двете велесили би биле САД и Кина.
Макрон ја позиционираше Франција како балансирачка држава во регионот во кој веќе подолго време доминира борба меѓу суперсилите Вашингтон и Пекинг.
Тензиите меѓу Вашингтон и Пекинг значително ескалираа во последните години поради бројните спорови, вклучувајќи ја и иднината на самоуправниот Тајван, човечките права и трговијата.
„Ние не веруваме во хегемонија или конфронтација. Веруваме во стабилност“, рече Макрон.
Самитот АПЕК 2022 се одржува во Банкок, главниот град на Тајланд, од 18 до 19 ноември.
Азиско-пацифичката економска соработка (АПЕК) е форум во кој учествуваат 21 земја од листата на Пацифичкиот прстен. Соработката е воспоставена во 1989 година.
