Си Ѓинпинг телефонски разговараше со Трамп по онлајн средбата со Путин

Кинескиот претседател Си Ѓингпинг денес одржа одделни разговори со претседателите на Русија и САД, пренесува Анадолу.

Си телефонски разговараше со американскиот претседател Доналд Трамп, објави „Синхуа њуз“.

Пекинг засега не објави повеќе детали за разговорот меѓу Си и Трамп, кој се одржал по неколку часа откако кинескиот претседател имал онлајн средба со рускиот претседател Владимир Путин.

Ова се првите телефонски разговори на Си со Путин и Трамп оваа година.

Разговорите на Си се одржаа во време на зголемени тензии меѓу САД и Иран, како и во време на засилени дипломатски напори за ставање крај на војната во Украина, откако денес во ОАЕ започна втората фаза од трилатералните разговори меѓу Киев, Москва и Вашингтон.

„Како одговорни големи држави и постојани членки на Советот за безбедност на Обединетите нации, Кина и Русија имаат обврска да ги здружат глобалните напори за цврсто почитување на правдата и правичноста, заштита на резултатите од Втората светска војна, зачувување на меѓународниот систем заснован на ОН и основните норми на меѓународното право, како и заедничко одржување на глобалната стратешка стабилност“, му рекол Си на Путин за време на видеоконференцијата.

Иако односите меѓу Кина и Русија значително зајакнаа во последните години, со трговска размена од околу 200 милијарди долари минатата година, односите меѓу Пекинг и Вашингтон се стабилизираа по средбата на Си и Трамп кон крајот на минатата година во Јужна Кореја.