Furkan Abdula
23 Август 2023•Ажурирај: 24 Август 2023
СКОПЈЕ (АА) - Во рамки на работната посета на Шпанија, министерот за надворешни работи на Северна Македонија, Бујар Османи, оствари средба со високиот претставник на ЕУ за надворешни работи и безбедносна политика и потпретседател на Европската комисија, Жозеп Борел, пренесува Анадолу.
Според соопштението на МНР на Северна Македонија, во фокусот на разговорите било европското досие на Северна Македонија, при што Османи го брифирал шефот на европската дипломатија за текот на парламентарната дебата со цел усвојување на уставните измени, како преземена обврска за непречен пат на земјата кон полноправното членство во ЕУ.
„Со усвојувањето на уставните измени Северна Македонија докажува дека е подготвена за членство во Европската Унија, а очекува од Унијата пристапните преговори да завршат до крајот на 2030 година. Оттука, ни земјата ни Унијата не смеат да дозволат никакво евентуално назадување од целта“, рече Османи.
Уверувајќи го Борел за максималните напори на Владата за европеизација на целокупниот политички систем преку веќе утврдените неопходни реформи, рефлектирани и во позитивните извештаи на Европската комисија, Османи го поздрави новиот План за развој на Европската комисија како навремен одговор на барањето на Северна Македонија за поголема интеграција и бенефити за нашите граѓани по патот кон пристапно членство.
„Поголема интеграција пред самото членство во ЕУ е во наш, но и во интерес на Унијата: Што поразвиен партнер денес, значи покорисен сојузник утре“, истакна Османи на средбата со Борел.
Соговорниците разменија мислења и за други актуелни теми, со акцент на последните случувања во регионот, а стана збор и за соработката меѓу Унијата и ОБСЕ, организација со која претседава министерот Османи.
