Khaled Ahmed Megahed Badr Elmowafy
27 Март 2026•Ажурирај: 30 Март 2026
РАБАТ/ИСТАНБУЛ (АА) - Извозот на нафта на Иран достигна околу 1,5 милиони барели дневно и покрај влијанието на тековната војна во која се вклучени Соединетите Американски Држави (САД) и Израел, објави вчера иранската полудржавна новинска агенција „Тесним“, пренесува Анадолу.
„Тесним“ извести дека дневниот обем на извозот надминал 1,5 милиони барели за време на месецот Рамазан, што претставува зголемување на продажбата за приближно 50% во споредба со претходните нивоа.
Агенцијата наведе дека Иран продава поголеми количини нафта по цени што се поблиску до глобалните референтни вредности, што директно ги зголемува приходите од нафта.
Ова зголемување доаѓа во време кога постои нестабилност на глобалните енергетски пазари поради тековната војна и одлуката на Иран да ја ограничи пловидбата во Ормускиот Теснец, една од најкритичните маршрути за транзит на нафта во светот.
Околу 20 милиони барели нафта поминуваат низ теснецот секој ден, а затворањето на теснецот ги зголеми трошоците за превоз и осигурување, придонесувајќи за повисоки цени на нафтата и инфлаторен притисок низ светот.
Според „Ашарк бизнис“ во соработка со „Блумберг“, Иран веројатно генерирал стотици милиони долари дополнителни приходи од почетокот на војната, имајќи корист од повисоките цени на суровата нафта во услови на ограничен пристап до теснецот за некои други извозници.
Инвеститорите и понатаму се загрижени поради влошувањето на неизвесноста на глобалните пазари бидејќи енергетските постројки во земјите од Персискиот Залив и Иран продолжуваат да се соочуваат со ризици од напади.
Постојат и стравувања дека иранската енергетска инфраструктура би можела да биде цел на потенцијални американски или израелски напади, што би можело да има значајни економски и еколошки последици.
Регионалните тензии се зголемени откако Израел и САД на 28 февруари започнаа заедничка офанзива во Иран, при што глобалните енергетски пазари се под притисок.
