„Меѓународната заедница да ја преиспита испораката на оружје на Израел“

БРИСЕЛ (АА) - Високиот претставник на Европската Унија (ЕУ) за надворешна политика и безбедност, Жосеп Борел, вчера ја повика меѓународната заедница да го преиспита снабдувањето на Израел со оружје, известува Анадолу.

„Колку пати слушнавте најистакнати лидери и министри за надворешни работи низ светот како зборуваат: 'премногу луѓе гинат'?“, праша Борел на конференцијата за новинари во Брисел.

Борел истакна дека дури и претседателот на САД, Џо Бајден, го коментирал бројот на мртви во Газа, велејќи дека тоа е премногу и дека не е пропорционално.

„Па, доколку верувате дека премногу луѓе се убиени, можеби би требало помалку оружје да му праќате на Израел за да спречите толку луѓе да бидат убиени“, рече Борел.

Потсетувајќи дека во 2006 година САД одлучиле да ја запрат испораката на оружје на Израел во текот на војната со Либан, кога Израел не сакаше да ја заврши војната, Борел рече дека „целосно иста работа“ се случува и денес.

„Сите одат во Тел Авив и молат: Ве молиме, немојте да го правите тоа, заштитете ги цивилите, немојте да убивате толку луѓе!“, рече Борел и праша: „Колку е премногу? Кој е тоа стандард?“

Високиот претставник на ЕУ истакна дека премиерот на Израел, Бенјамин Нетанјаху, не слуша никого бидејќи инсистира на тоа дека Израел мора да го преземе целиот Појас Газа.

„Доколку меѓународната заедница навистина верува дека ова е масакр, дека премногу луѓе се убиени, можеби ќе мора да подразмисли за прашањето на испораката на оружје“, рече Борел, повикувајќи се на холандскиот суд кој нареди прекин на испораката на делови за авионите Ф-35 на Израел од Холандија, со цел да се имплементира привремената одлука на Меѓународниот суд на правдата.