Австрија победник на Евровизија, Израел се соочи со протести поради нападите во Газа

АНКАРА/БАЗЕЛ (АА) - Австрија победи на натпреварот за песна на Евровизија 2025 кој се одржа синоќа во швајцарскиот град Базел, додека учеството на Израел во финалето предизвика протести поради воените акции на Тел Авив во Појасот Газа, јавува Анадолу.

Израелската пејачка Јувал Рафаел се соочи со исвиркувања и пропалестински знамиња од публиката за време на нејзиниот настап на 69-тото издание на Евровизија, на кој во финалето учествуваа 26 земји.

Европската радиодифузна унија (EBU), која го организираше натпреварот, беше критикувана за емитување аплауз наместо исвиркување за време на преносот во живо.

Платформите на социјалните мрежи беа преплавени со визуелни слики на транспаренти и скандирања за поддршка на Палестина, а многу корисници ја обвинија Европската радиодифузна унија за цензура.

Швајцарскиот радиодифузер СРГ ССР објави дека двајца демонстранти се обиделе да се качат на сцената на крајот од настапот на Рафаел, при што едниот фрли боја.

Двајцата се приведени од обезбедувањето.

И покрај протестите, Израел заврши втор со 357 поени, зад австрискиот претставник Џеј Џеј, кој победи со 436 поени со „Wasted Love“.

Естонија беше трета со 356 поени.

Илјадници луѓе се собраа на плоштадот Барфусерплац во Базел пред финалето за да побараат исклучување на Израел од натпреварот и побараа ЕБУ трајно да ја забрани земјата од учество на натпреварот.

Протестот се случи во услови на растечки критики за одлуката на ЕБУ да ја исклучи Русија во 2022 година за војната во Украина, но не и Израел за неговите акции во Газа.

Јавниот радиодифузен сервис на Шпанија РТВЕ, исто така, изрази солидарност со Газа, емитувајќи порака на шпански и англиски јазик пред финалето на која пишуваше: „Кога станува збор за човекови права, тишината не е опција. Мир и правда за Палестина“.

Протести ги одбележаа претходните настани на Евровизија во Базел, вклучувајќи ја церемонијата на отворање и двете полуфиналиња, а демонстрациите привлекоа значително внимание низ цела Европа.

Израелската армија спроведува брутална офанзива во Газа од 7 октомври 2023 година, во којашто се убиени над 53.000 Палестинци, повеќето од нив жени и деца.

Меѓународниот кривичен суд во ноември издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со тужба за геноцид пред Меѓународниот суд на правдата за своите воени дејства во енклавата.