Ruslan Rehimov
22 Септември 2023•Ажурирај: 24 Септември 2023
БАКУ (АА) – Советникот на претседателот на Азербејџан, Хикмет Хаџиев, денес изјави дека надлежните азербејџански установи се подготвени да им обезбедат медицинска помош на ранетите ерменски војници во Карабах, јавува Анадолу.
Хаџиев на социјалната мрежа Х наведе дека во Баку се сретнал со претставници на Канцеларијата на Меѓународниот комитет на Црвениот крст (МКЦК) и претставници на други меѓународни организации.
Наведувајќи дека претставниците со кои се сретнал го поздравиле почитувањето на меѓународното хуманитарно право од страна на азербејџанската војска и спречувањето на колатералната штета во антитерористичката операција, Хаџиев потсети дека и ерменскиот премиер Никол Пашинјан признал дека нема повредени цивили во азербејџанската операција во Карабах.
Тој додаде дека биле обезбедени и ќе продолжат да се обезбедуваат сите неопходни услови за испорака на лекови, храна и други потреби од страна на Меѓународниот комитет на Црвениот крст по патните правци Лачин - Ханкенди и Агдам - Ханкенди.
„Азербејџанската страна е подготвена да обезбеди медицинска помош за ранетите ерменски војници или да им помогне преку МКЦК. Го поддржуваме собирањето на персоналот со возила на МКЦК“, рече Хаџиев.
Тој додаде дека заедно со руските мировници работеле на собирање на телата што останале на бојното поле и напомена дека тие, исто така, го поддржале и праќањето дополнителен персонал на МКЦК во Ханкенда.
Азербејџанската војска на 19 септември започна антитерористичка операција во Карабах за враќање на уставниот поредок. Илегалните ерменски вооружени сили во Карабах го положија оружјето по операцијата што траеше скоро 24 часа.
