Американски политичари ќе ги посетат Израел и Палестина

ВАШИНГТОН (АА) - Делегација составена од Стени Хојер, лидер на мнозинството во Претставничкиот дом на Соединетите Американски Држави (САД), и демократски пратеници, ќе ги посетат Израел и Западниот Брег во рамки на односите меѓу САД и Израел и на меѓународната безбедност, пренесува Anadolu Agency (AA).

Според соопштението објавено на интернет-страницата на Претставничкиот дом, Хојер и неговата делегација меѓу 5 и 11 август ќе реализираат посета на Израел.

Хојер и другите претставници ќе се состанат со високи претставници, меѓу кои израелскиот премиер Бенјамин Нетанјаху и претседателот на Палестина, Махмуд Абас.

Хојер изрази задоволство што ќе го посети Израел со бројни други претставници, со цел подобро да ги разберат заканите со кои Израел се соочува на Средниот Исток, како и за потврдување на односите меѓу САД и Израел.

Во рамки на оваа програма ќе бидат реализирани средби и со палестински бизнисмени, израелски невладини организации, како и активисти.

Се вели дека оваа посета ќе биде финансирана од страна на Американско-израелската образовна фондација која се смета за „независна и непрофитна организација“.