Бајден: Меѓу убиените Палестинци во Газа има премногу недолжни цивили

ВАШИНГТОН (АА) - Американскиот претседател Џо Бајден изјави дека меѓу Палестинците убиени во Газа има „премногу“ невини цивили, повторувајќи ја својата загриженост дека Израел ја продолжува својата воена операција врз градот Рафа по воздушните напади, јавува Анадолу.

„Повеќе од 27.000 Палестинци убиени во овој конфликт беа невини цивили, вклучително и илјадници деца“, рече Бајден за време на заедничката прес-конференција со јорданскиот крал Абдула Втори во Белата куќа.

Бајден, исто така, рече дека стотици илјади луѓе немаат пристап до храна, вода или други основни потреби и дека многу семејства изгубиле не само еден туку многу членови.

„Тоа е навистина потресно“, рече американскиот претседател.

„Секој невин изгубен живот во Газа е трагедија. Исто како и секој невин изгубен живот во Израел е трагедија“, рече Бајден.

Јорданскиот крал Абдула Втори, исто така, изрази загриженост поради планот на Израел да го нападне Рафа, велејќи дека тоа „сигурно ќе предизвика уште една хуманитарна катастрофа“.

„Ситуацијата е веќе неподнослива за повеќе од милион луѓе што беа принудени да влезат во Рафа од почетокот на војната“, рече тој, додавајќи дека тие не можат само да стојат настрана и да дозволат да се случи тоа.

Во неделата израелската армија одобри план за копнена офанзива врз Рафа.

По обвинението за геноцид поднесено од Јужноафриканската Република, на 26 јануари Меѓународниот суд на правдата одлучи дека Израел мора да се воздржи од какви било дејства поврзани со убиства, напади и уништување на жителите на Појасот Газа и да ги преземе сите мерки за да спречи геноцид.

Сепак, израелските сили продолжуваат да го напаѓаат Појасот Газа.

Израел, кој е обвинет за геноцид, уби 28.340 Палестинци во Појасот Газа за 128 дена.