Бајден ќе биде домаќин на лидерите на Шведска и Финска поради барањата за влез во НАТО

ВАШИНГТОН (АА) - Претседателот на САД, Џо Бајден, ќе ги угости шведската премиерка Магдалена Андерсон и финскиот претседател Саули Ниинисте во врска со нивниот обид да се приклучат кон НАТО, соопшти Белата куќа, пренесува Агенција Анадолија (АА).

За време на состанокот во четврток „лидерите ќе дискутираат за барањата на Финска и Шведска за влез во НАТО и за европската безбедност, како и за зајакнување на нашите блиски партнерства, за низа глобални прашања и поддршката за Украина“, велат од Белата куќа.

Шведската Влада денес потпиша официјално барање за приклучување кон НАТО, додека финскиот Парламент го одобри барањето на земјата за членство во НАТО.

За која било нова членка што треба да се приклучи кон НАТО, сите членови треба едногласно да се согласат, вклучително и Турција.

Турција, долгогодишна членка на НАТО, изрази приговори за кандидатите за членство Финска и Шведска, критикувајќи ги двете нордиски земји за толерирање, па дури и за поддршка на терористичките организации како ЈПГ/ПКК.