Блинкен: Договорот за прекин на огнот меѓу Израел и Либан „се одржува“

ЖЕНЕВА (АА) - Американскиот државен секретар Ентони Блинкен денес рече дека договорот за прекин на огнот меѓу Израел и Либан „се одржува“ и покрај серијата инциденти, а Бејрут го обвинува Тел Авив за над 100 прекршувања на договорот за прекин на огнот од страна на израелските сили откако беше потпишан минатата недела, јавува Анадолу.

„Примирјето се одржува и ние го користиме механизмот што беше воспоставен кога се појави загриженост за наводни прекршувања“, изјави Блинкен пред новинарите по состанокот на министрите за надворешни работи на земјите членки во НАТО во Брисел.

Тој мислеше на надзорниот механизам воспоставен од САД и Франција, кои рекоа дека „ќе се осигури дека прекинот на огнот е ефикасно мониториран и имплементиран“.

„Сакаме да се погрижиме тој (механизмот) да продолжи да функционира“, истакна Блинкен.

Неговите изјави доаѓаат во услови кога Израел и Хезболах меѓусебно се обвинуваат за кршење на договорот за прекин на огнот, кој стапи на сила минатата среда, со надеж дека ќе стави крај на над 14-месечните борби меѓу израелската армија и либанската група на отпорот.

„Мислам дека, во основа, двете страни, односно Израел и Хезболах, како и либанската Влада, го сакаа и продолжуваат да го сакаат прекинот на огнот“, рече тој, додавајќи: „Мора да се погрижиме тој да се одржи и ние сме решени да го реализираме тоа.“

Без детали за механизмите за спроведување, Блинкен рече: „Ако постои загриженост дека едната или другата страна го прекршува прекинот на огнот, тоа доаѓа кај нас, на овој или оној начин, ние ги ангажираме страните.“

Според условите за прекин на огнот, Израел треба да ги повлече своите сили јужно од Сината линија, а либанската армија ќе ги распореди своите сили во Јужен Либан во рок од најмногу 60 дена.

Либан пријави над 120 израелски прекршувања на примирјето откако договорот стапи на сила на 27 ноември.

Според извештајот на Анадолу врз основа на бројките на Министерството за здравство, најмалку 14 лица се убиени, а 13 се повредени во израелските напади од минатата недела.