Братислава: Ковачевски се сретна со специјалниот претставник на ЕУ за Западен Балкан, Лајчак

СКОПЈЕ (АА) - Претседателот на Владата на Северна Македонија, Димитар Ковачевски, денеска во Братислава оствари средба со специјалниот претставник на Европската Унија за Западен Балкан, Мирослав Лајчак, пренесува Анадолу.

Според соопштението на Владата на Северна Македонија, Ковачевски во Братислава учествува на Глобалниот безбедносен форум на ГЛОБСЕК 2023.

„На средбата, премиерот Ковачевски ја потенцираше заложбата на Владата, Северна Македонија како и досега да придонесува за унапредување на регионот како и за неговата мир и стабилност“, се вели во соопштението.

Ковачевски потенцираше дека Северна Македонија има цврста определба за зајакнување и унапредување на добрососедските односи и преку дијалог и соработка меѓу државите се етаблираше како држава фактор на стабилност во регионот.

„Ковачевски ја истакна максималната посветеност на Владата на реформскиот процес во земјава како и на процесот на пристапни преговори за членство на Северна Македонија во ЕУ“, се нагласува во ова соопштение.

Двајцата соговорници истакнаа дека во државата е потребен политички дијалог и сите општествени, политички, невладини, граѓански чинители во државата потребно е да постигнат консензус како не би се кочел процесот за членство на Северна Македонија во ЕУ.

На средбата од страна на премиерот Ковачевски беше нагласено дека брзото членство на земјите од Западен Балкан во ЕУ би спречило чувствителните точки во регионот да ја нарушат безбедноста и стабилноста, а со тоа и да го закочат економскиот развој на регионот.

„Ковачевски и Лајчак повикаа на итна деескалација на состојбата во Косово и враќање на мирот и стабилноста. Премиерот Ковачевски повтори дека Северна Македонија го поддржува продолжувањето на соработката и координацијата со НАТО и ЕУ во регионот во насока на консолидирање на стабилноста и забрзување на евроатлантската интеграција на Западен Балкан“, се додава во владиното соопштение.