Burak Bir
11 Април 2023•Ажурирај: 12 Април 2023
ЛОНДОН (АА) - Десетици илјади лекари-стажанти денес започнаа четиридневен штрајк во Велика Британија поради нерешениот спор околу платите, јавува Анадолу.
Деведесет и шестчасовниот штрајк е „втора рунда“ на штрајкот на Британската медицинска асоцијација (BMA). Тие штрајкуваа 72 часа од 11 до 13 март.
Се проценува дека 350.000 закажани термини, меѓу кои и операции, ќе бидат откажани поради штрајкот, јавија локалните медиуми.
Во соопштението објавено на крајот на март, синдикатот истакна дека е донесена одлука за одржување нов штрајк откако „досега најголем број лекари-стажанти“ гласале за штрајк.
„Владата продолжува да одбива да одобри целосно зголемување на платите. Лекарите-стажанти немаат друга опција освен да преземат акција“, се додава.
Додека обемот на работа и листите на чекање се на рекордно високо ниво, платите на лекарите-стажанти се намалени за повеќе од една четвртина од 2008 година, според БМА.
Метју Тејлор, главен извршен директор на Конфедерацијата на Националната здравствена служба (НХС), вчера за Скај њуз рече дека штрајкот има „катастрофално влијание“ врз листите на чекање на НХС.
