Бугарскиот министер за туризам „Ќе побараме надомест од ЕУ за трошоците за сместување на украинските бегалци“

СОФИЈА (АА) - Бугарскиот министер за туризам, Христо Проданов, истакна дека гостопримството што им се покажува на Украинците кои бегаат од војната и престојуваат во хотели треба да заврши на 31 мај, пренесува Агенција Анадолија (АА).

Во изјава за Бугарската национална телевизија БНТ, Проданов, наведувајќи дека се ближи туристичката сезона, рече дека Украинците кои престојуваат во хотели, ќе мора да изнајмуваат станови.

Нагласи дека би било соодветно Украинците да најдат работа. „Нашата државна поддршка за Украинците треба да заврши на крајот на мај. Овие луѓе треба да почнат да работат по тримесечен период на хуманост и разбирање.“

Проданов, посочувајќи дека на хотелите во кои се сместени украинските бегалци дневно им се дава финансиска поддршка од околу 20 евра по лице, рече дека за таа намена досега се потрошени околу 6 милиони евра.

Нагласи дека државните трошоци за сместувањето на бегалците може да достигнат 25 милиони евра, и дека за овие трошоци ќе се бара надомест од Европската Унија (ЕУ).

Сопствениците на хотелите за кои поддршката од 20 евра е недоволна, бараат или да се зголеми дадената поддршка или да најдат решение за украинските бегалци пред почетокот на сезоната.

Јавноста која генерално има позитивен став кон украинските бегалци, реагира на изјавите на министерот Проданов.

Граѓаните преку социјалните мрежи започнаа петиција за оставка на Проданов.