Велика Британија: Евроскептичната партија Брегзит води на изборите за ЕП

ЛОНДОН (АА) - Според неофицијалните резултати објавени доцна синоќа, новоформираната партија Брегзит води на европските избори во Велика Британија, јавува Anadolu Agency (AA).

Двете главни партии - Конзервативната и Лабуристичката - доживеаја разочарувачки резултати бидејќи ги изгубија гласовите на сметка на партиите за појасни стратегии за Брегзит.

Со агенда за држење на земјата како дел од блокот, либералдемократите се на второто место на изборите за Европскиот парламент.

Гласачите кои сакаат Велика Британија да ја напушти ЕУ без договор гласаа за партијата Брегзит, додека оние кои сакаат Британија да остане во блокот, гласаа за либералдемократите.

Според досега објавените резултати, 64 нови членови на Европскиот парламент од Велика Британија ќе влезат во Европскиот парламент, од кои партијата Брегзит на Најџел Фараџ освои 28 места.

Проевропските либералдемократи освоија 15 места, лабуристите 10, зелените 7, конзервативците 3 и Партијата на Велс 1 место.

- Партијата Брегзит -

Формирана во 2019 година од лидерот на поранешната Партија за независност на Велика Британија, Најџел Фараџ, партијата на евроскептиците брзо зајакна благодарение на гласачите кои беа разочарани од раководењето на преговорите за Брегзит и двете продолженија на роковите од страна на владејачките ториевци (конзервативци).

Партијата доби околу една третина од сите гласови, според прелиминарните резултати.

Фараџ, кој водеше кампања за напуштање на блокот пред референдумот за Брегзит во 2016 година, е популистички лидер познат по неговата екстремно десничарска и антимигрантска реторика.

Тој ја користеше турската кандидатура за полноправно членство во ЕУ за време на неговата пропаганда за Брегзит и другите изборни кампањи.