Во Израел пронајдени „1.500 тела“ на палестински вооружени лица, тврди израелски воен претставник

КУДС (АА) - Претставник на израелската армија изјави дека армијата пронашла околу „1.500 тела“ на палестински вооружени лица во населбите околу Газа, пренесува Анадолу.

„Во изминатите денови израелската армија пронашла не помалку од 1.500 тела на палестински вооружени лица на израелските територии“, изјави за Анадолу официјален претставник на израелската армија, кој побара да остане анонимен.

Тој не даде повеќе детали за ова прашање.

Палестинската страна, особено групата Хамас, допрва треба да ги коментира тврдењата на израелската армија.

Во текот на изминатите три дена вооруженото крило на Хамас, Бригадите Ал-Касам, објави неколку видеа од своите борци што упаднаа на израелските воени локации околу Газа, на кои, исто така, се гледа како се убиваат и апсат израелски војници.

Палестинската група Хамас ја започна операцијата „Поплава Ал Акса“ против Израел рано во саботата, истрелувајќи низа ракети и инфилтрирајќи се во Израел по копно, воздух и море.

Се наведува дека ненадејниот напад бил одговор на упадот во џамијата „Ал Акса“ во окупираниот Источен Кудс (Ерусалим) и зголеменото насилство на доселениците врз Палестинците.

Како одмазда, израелската војска ја започна операцијата „Железни мечеви“ против Хамас во Појасот Газа.

Бројот на Палестинци убиени од израелските сили во Газа се искачи на 704, од кои 143 деца и 105 жени, соопшти Министерството за здравство со седиште во Газа. Се вели дека бројот на ранети се искачи на околу 4.000.

Според израелското Министерство за здравство, во борбите се убиени најмалку 900 Израелци, а над 2.600 други се ранети.