ГАЗА (АА) - Најмалку 12 Палестинци се убиени денес во израелските напади, чија цел беа дом и цивили во градот Газа, додека израелската геноцидна војна врз Газа продолжи со несмалено темпо, јавува Анадолу.
Десет лица ги загубија животите во напад врз дом во населбата Ал-Дараџ, изјави медицински извор за Анадолу.
Цивилната одбрана на Газа соопшти дека делови од тела и јагленосани остатоци од жртвите биле донесени во болница.
Уште две лица се убиени во друг напад чија цел беа група цивили во близина на џамија во населбата Зејтун во источниот дел на градот Газа, изјавија очевидци.
Во северниот дел на Појасот Газа израелско беспилотно летало изврши напад врз болницата „Камал Адван“, во областа Беит Лахија, предизвикувајќи пожар во една од болничките згради, велат очевидци.
Тие додадоа дека израелската Армија поставила замки и експлозив околу болницата.
Беспилотно летало на израелската Армија синоќа ги погоди генераторите за струја на болницата, предизвикувајќи прекин на електричната енергија и штета во нејзината единица за интензивна нега.
Израел на 5 октомври започна голема копнена операција во северниот дел на Газа за наводно да го спречи прегрупирањето на палестинската група на отпорот Хамас. Палестинците, сепак, го обвинуваат Израел дека сака да ја окупира областа и насилно да ги исели нејзините жители.
Оттогаш не е дозволено да влегува доволно хуманитарна помош, вклучително храна, лекови и гориво, во областа, оставајќи го населението што останало таму на раб на глад.
Во бруталната израелска војна во Појасот Газа од 7 октомври 2023 година досега се убиени повеќе од 45.000 луѓе, главно жени и деца.
Меѓународниот кривичен суд на 21 ноември издаде налози за приведување на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата за неговата војна против Газа.
